Premer-mınıstrdiń birinshi orynbasary Roman Sklıar «Amanat» partııasy Ortalyq apparatynyń qoǵamdyq qabyldaýynda azamattardy jeke qabyldady. Kezdesý barysynda belsendilerden, elorda turǵyndary men úkimettik emes uıymdardyń ókilderinen birqatar qoǵamdyq mańyzdy ótinishter kelip tústi.
Azamattar kóp másele kóterdi. «Úrker» turǵyn úı alabynyń belsendileri aýla klýbtaryna resmı mártebe berý qajettigine nazar aýdardy. Olardyń aıtýynsha, mundaı klýbtar balalardyń bos ýaqytyn durys uıymdastyrýda mańyzdy ról atqarady. Onda ártúrli shyǵarmashylyq sabaqtar, aspazdyq kýrstar ótkiziledi. Buǵan qosa otbasymen kelýge arnalǵan basseıni bar zamanaýı sport keshenin salý týraly usynys ta aıtyldy.
«Temeki tútininen azat Qazaqstan úshin» ulttyq koalısııasynyń jetekshisi jastardyń densaýlyǵyn qorǵaýdyń ári temekige táýeldilikti tómendetýdiń mańyzdylyǵyn atap ótip, kalıandardy paıdalanýdy shekteý jónindegi sharalardy qatańdatý týraly máseleni kóldeneń tartty.
Elorda turǵyny Qostanaı oblysynda gaz qubyrlaryn zańsyz paıdalaný faktileri bolýy múmkin ekenin habarlap, tekserý júrgizýdi surady.
Al «Creative & Innovation Institute» Ortalyq Azııanyń ornyqty damý ortalyǵy» QQ dırektory avtorlyq bilim berý baǵdarlamasyn engizý bastamasyna toqtaldy. Onyń aıtýynsha, baǵdarlama oqýshylardyń kreatıvti jáne sıfrlyq oılaý qabiletin damytýǵa arnalǵan. Bul qazirgi tehnologııalar qaryshtap damyǵan zamanda erekshe ózekti ekeni belgili.
Sondaı-aq Qaraǵandy turǵyny balalardyń jan-jaqty damýyna baǵyttalǵan PLATON 5D avtorlyq bilim berý baǵdarlamasy týraly aıtyp berdi. «Baǵdarlama patenttelgen jáne IýNESKO talaptaryna sáıkes keledi» dedi ol, biraq ony júzege asyrý úshin qosymsha qarjy qajet.
Aıtylǵan barlyq ótinishter muqııat qaraldy. Olardyń árqaısysy boıynsha ýákiletti organdar arnaıy jumystar júrgizedi.
Roman Sklıar partııanyń qoǵamdyq qabyldaý bólmesi memlekettiń azamattarmen dıalogi úshin mańyzdy alań bolyp qalatynyn, bul qoǵamdy tolǵandyratyn máselelerge jedel den qoıýǵa múmkindik beretinin aıtty.