Qýyrshaqtar jansyz dúnıe dep kim aıtty? Olar keıde adam júreginiń aıqaıyn, jannyń eń tereń tylsymyn, tipti sózben aıtyp jetkize almaıtyn kúızelisti de áıgileýge qaýqarly. Memlekettik akademııalyq qýyrshaq teatry kórermenge dál osyndaı rýhanı salmaǵy zor, oı tereńine jeteleıtin erekshe qoıylym – «Men kimmin?» spektakliniń premerasyn usyndy.
Bul – eresekterge arnalǵan, fılosofııalyq máni tereń, adam tabıǵatynyń jumbaq álemin ashatyn týyndy. Spektakl qoǵamdaǵy rýhanı jalǵyzdyq pen adamdyq kelbetti joǵaltý syndy búginginiń ótkir máselelerin qýyrshaq óneriniń kórkem quraldary arqyly paıymdaıdy.
Qoıylym adamnyń ishki álemine tereń boılaıdy. Basty keıipkerdiń janaıqaıy, ózin tabýǵa degen talpynysy, qoǵammen úndese almaı dal bolýy – barlyǵy sımvoldyq beıneler arqyly jetkiziledi. Sahnadaǵy ár qýyrshaq, ár jaryq, ár qozǵalys – keıipkerdiń kóńil kúıiniń kórinisi.
Adamnyń ózi men kóleńkesi, senimi men kúdigi, álsizdigi men qýaty arasyndaǵy máńgilik tartys kórermendi bir mezet oılanyp, bir mezet tolǵanýǵa jeteleıdi. «Men kimmin?» degen bir ǵana suraqtyń artynda ár adamnyń óz taǵdyry, óz súrleýi, óz syrly álemi jatqandaı.
Premeranyń rejısseri – Gúrjistannan arnaıy shaqyrylǵan, qýyrshaq teatry ónerinde ózindik baǵyt qalyptastyrǵan Nıkoloz Sabashvılı. Onyń maqsaty – kúrdeli ıdeıalardy kórkemdik sheshimmen toǵystyryp, qýyrshaq arqyly tereń psıhologııalyq beıneler týdyrý. Bul joly da rejısser adam janyn qýyrshaqtyń plastıkasy, jaryq pen kóleńkeniń qaqtyǵysy jáne taǵy da basqa utqyr sımvoldyq detaldarmen órnektep, kórermendi shyn máninde oı saıahatyna jeteleıdi.
«Men kimmin?» – búgingi qoǵamdaǵy eń ózekti suraqtardyń biri. Biz osy qoıylym arqyly kórermendi óz bolmysyna, adamdyq mánge qaıta úńilýge shaqyramyz. Qýyrshaq teatry tek balalarǵa arnalǵan dep oılaıtyndar qatelesedi. Bul óner kúrdeli ıdeıalardy da názik, kórkem ári tereń jetkize alady. Premera kórermenge erekshe áser qaldyrady dep senemiz», deıdi qýyrshaq ónerindegi tyń tájirıbe týraly teatr dırektory Almat Amangeldi.
Iá, «Men kimmin?» – jaı ǵana spektakl emes, qazirgi qoǵamǵa qoıylǵan kórkem saýal. Rýhanı daǵdarysqa ushyraǵan adamzat bolmysy, tulǵalyq qundylyqtyń álsireýi, adam ishindegi únsiz kúres – bári sahnalyq tilmen sheber órilip, jan tebirenter kórinis retinde aldyńyzǵa keledi. Kórermen bul qoıylymnan tek estetıkalyq áser ǵana almaıdy. Ár kórinis, ár qımyl, ár únsizdik – ózińizge qarata qoıylǵan suraq sekildi.