Májilis depýtaty Janarbek Áshimjan eldegi úsh iri uıaly baılanys operatorynyń tarıfterin 20%-ǵa kóterý josparyn synap, bul árekettiń naryqtaǵy básekelestikti shekteý qaýpin týdyratynyn aıtty, dep habarlaıdy Egemen.kz.
Depýtattyń sózinshe, operatorlar arasyndaǵy baǵanyń bir ýaqytta ósýi táýelsiz sheshimnen góri, ózara kelisimniń belgisi bolýy múmkin.
«Úsh iri operatordyń bir ýaqytta tarıf kóterýi naryqtaǵy básekeniń emes, ózara kelisimniń, úılesimniń belgisi sııaqty kórinedi», dedi depýtat.
Janarbek Áshimjannyń aıtýynsha, osy jaǵdaı uıaly telefon men ınternet qyzmetin jetkizý sektorynda monopolııalyq kelisim faktilerin tekserýdi qajet etedi.
«Atalǵan kompanııalar naryqtaǵy ústemdik jaǵdaıyn paıdalanyp, baǵa jóninde kelisim jasady ma, joq pa sony anyqtaý kerek. Bul naryqqa zańsyz erekshe quqyq berilgenin kórsetedi. Mundaı erekshelikti joıý úshin basqa qatysýshylardy tartý qajet, ıaǵnı básekelestikti arttyrý mańyzdy», dedi depýtat.
Operatorlardyń túsindirýinshe, tarıfterdiń ósýine jańa Salyq kodeksi, sondaı-aq jelilerdi damytý, jańǵyrtý jáne qyzmet kórsetý shyǵyndarynyń artýy sebep bolǵan.
Osy rette depýtattar Premer-mınıstrden jáne Básekelestikti qorǵaý agenttiginen tarıfterdiń qymbattaýy jáne operatorlardyń naryqtaǵy is-áreketteri boıynsha tolyq túsinikteme berýdi talap etti.