Aqtaýda «Pedagog jáne JI: zamanaýı sıfrlyq oqytý quraldary» taqyrybynda trenıng ótti. Is-sharany Tımýr Qulybaevtyń Halyk qorynyń «Tálimger» bilim berý jobasy jáne Mańǵystaý oblysy ákimdiginiń qoldaýymen NNEF qoǵamdyq qory uıymdastyrdy. Semınar-trenıngke Aqtaý, Jańaózen, Beıneý, Munaıly jáne Túpqaraǵan aýdandarynan 60 pedagog qatysty, dep habarlaıdy Egemen.kz.
Jasandy ıntellekttiń múmkindigin tıimdi paıdalaný
Semınardyń negizgi maqsaty – muǵalimderge jasandy ıntellektini bilim berýde tıimdi qural retinde kórsetý. Zamanaýı tehnologııalar osyǵan deıin bilim berýde qoldanylyp kelgen dástúrli tásilderdi tez ózgertip jatyr. Al jasandy ıntellekt endi pedagogtardyń kúndelikti jumysynyń bir bóligine aınalyp, sabaqqa daıyndalýǵa, testter men kórneki materıaldar jasaýǵa, oqytý úderisin oqýshynyń jeke qabiletin eskerip beıimdeýge kómektesetin taptyrmas quralǵa aınalyp úlgerdi.
«Bilim berý salasyn damytý jáne pedagogtardyń quzyrettiligin arttyrý – jumysymyzdyń basty baǵyttarynyń biri. Muǵalimderdiń kásibı turǵydan ósýine jáne jańa tehnologııalardy barynsha meńgerýine múmkindik jasaýǵa barymyzdy salamyz. Sondyqtan Halyk qorymen birge osyndaı bilim berý bastamalaryn júzege asyryp kelemiz», dedi NNEF qoǵamdyq qorynyń bilim berý bóliminiń basshysy Marııa Kovjasarova.
Oqytýdyń bes praktıkalyq modýli
Semınar baǵdarlamasy jalpy uzaqtyǵy 20 saǵatty qamtıtyn bes praktıkalyq modýlden turdy. Onyń birinshisi – «JI bilim berýde». Munda jasandy ıntellektiniń múmkindikteri, sıfrlyq oqytý ádebi jáne akademııalyq adaldyq negiz bolady. Ekinshi modýl – «JI kómegimen sabaqqa daıyndalý»: ChatGPT jáne basqa platformalardy jospar, test jáne tapsyrma ázirleýde paıdalaný. Úshinshi modýl – «Vızýaldy kontent jasaý»: Gamma AI jáne Canva arqyly prezentasııalar daıyndaý. Tórtinshisi – «Mýltımedıa jáne ınfografıka»: vıdeo, sýret jáne aýdıo materıaldardy daıyndaýǵa qajetti quraldardy meńgerý. Besinshi modýl – «Geımıfıkasııa»: EducaPlay, Quizizz, Classcraft platformalary arqyly oqýshylardyń bilimge qyzyǵýshylyǵyn arttyrý.
Bul modýlderdiń barlyǵy praktıkalyq jattyǵýlarǵa negizdelgen. Kýrs barysynda qatysýshylar dáris tyńdap qana qoımaı, ózderine qajetti oqý materıaldaryn jasap, JI quraldaryn qoldanyp, óz jumysyndaǵy naqty keısterdi talqylaýǵa múmkindik aldy.
«JI múmkindikterin túsindirip qana qoımaı, muǵalimderge bul quraldardy synypta qalaı qoldana alatynyn kórsetý biz úshin basty maqsat boldy. Aqtaý men aýdandardan kelgen muǵalimder belsendi túrde trenıngke qatysyp, suraqtar qoıyp, túrli tájirıbe jasaǵany bizdi qatty qýantty», dedi baǵdarlama treneri, Almaty qalasyndaǵy «Mıras» halyqaralyq mektebiniń oqytýshysy Erlan Kerimbaı.
Al bilim berýde jasandy ıntelektini qoldaný taqyryby boıynsha Býdapesht ýnıversıtetinde dıssertasııa qorǵap kelgen, jobanyń treneri Adılıa Battalovanyń aıtýynsha, jasandy ıntellektini muǵalimdi almastyratyn qural dep emes, kómekshi retinde qabyldaý kerek.
«Muǵalimderge ChatGPT jáne basqa da jasandy ıntellekt quraldarynyń taptyrmas kómekshi bolatynyn kórsettik. Eń bastysy, synı turǵydan oılaý, shyǵarmashylyq ádis-tásildi qoldaný», dedi baǵdarlama treneri Adılıa Battalova.
JI arqyly sabaqty túrlendire túsýge bolady
Trenıngke qatysqan pedagogtar jasandy ıntellekt sabaqty barynsha túrlendire túsip, oqýshynyń qyzyǵýshylyǵyn arttyrýdyń oń joly ekenin aıtady.
«Jasandy ıntellektke qatysty kýrstan ótip, biz tek ChatGPT quraly jaıly ǵana emes, balalarmen jumys isteýdiń tıimdi tásilderin, oqýshynyń damýyna, mamandyq tańdaýyna baǵyt berý joldaryn da úırendik. Biz túrli baǵdarlamany meńgerip, óte paıdaly keńester aldyq», dedi Basqudyq aýylyndaǵy №14 orta mektebiniń muǵalimi Aıtbıbi Bekova.
Mańǵystaý oblysy bilim basqarmasy oqý-ádistemelik ortalyǵynyń qoǵamdyq-gýmanıtarlyq bilim berý bóliminiń basshysy Jansaıa Moldajanovanyń aıtýynsha, qazir jasandy ıntellekt qoǵam damýyna áser etetin negizgi tehnologııalardyń birine aınaldy.
«Oǵan memleket basshysy Qasym-Jomart Toqaev ta ustazdardyń tamyz keńesinde asa mán bergen bolatyn. Jasandy ıntellekt qazir bilim berý salasyna da belsendi túrde engizilip jatyr», deıdi.
Is-shara sońynda trenıngtiń barlyq qatysýshysyna jasandy ıntellektini bilim berýde qoldanýǵa qajetti daǵdylardy meńgergenin rastaıtyn sertıfıkat tabystaldy. Pedagogtar bul jańa tásilderdi óz mektepteri men kolledjderinde engizýdi josparlap otyr.
NNEF qoǵamdyq qory men Tımýr Qulybaevtyń Halyk qory osyndaı bilim berý bastamalaryn jalǵastyryp, baǵdarlamanyń aýqymyn keńeıtý ári qatysýshylar sanyn arttyrýdy kózdep otyr. Jobanyń basty maqsaty – muǵalimniń ózine senimdiligin arttyryp, oqýshyǵa zaman talabyna saı bilim alatyn turaqty sıfrlyq oqytý ekojúıesin qalyptastyrý.