Aqtóbe oblysy Shalqar aýdanynyń Bershúgir aýyldyq okrýgine qarasty Sarysaı aýylynda jáne Kishiqum aýyldyq okrýginiń Shoqysý aýylynda eki dárigerlik pýnkt ashyldy. Emdeý mekemeleri «Aýylda densaýlyqty saqtaýdy jańǵyrtý» ulttyq jobasy aıasynda iske asty jáne oblystyq bıýdjet pen qaıtarylǵan aktıvter esebinen qarjylandyryldy, dep habarlaıdy Egemen.kz.
Shoqysý aýylyndaǵy bir aýysymda 20 turǵyndy qabyldaıtyn medısınalyq pýnkt qurylysyna 126,5 mln teńge, al Sarysaı aýylyndaǵy bir aýysymda 25 turǵyndy qabyldaıtyn medısınalyq mekeme qurylysyna 133,8 mln teńge qarajat jumsaldy.
«Aýyl turǵyndary emdeý mekemesiniń ashylýyn kópten kútken edi. Syrqattardy qabyldap, qajetti em-dom júrgizip, joldama berip, sábılerge ekpe salý úshin óz aýylymyzda ambýlatorııa bolǵanyn qaladyq. Usynys qylyp aıttyq. О́tinishimiz oryndalyp, jaqsy da jaıly emdeý mekemesi salynǵanyna qýanyp jatyrmyz. Ambýlatorııanyń jumysyn júrgizetin qajetti maman ózimizde bar. Ol 40 jyldan beri osy salada eńbek etip júrgen Raıa Aqjaparova», deıdi Sarysaı aýylynyń turǵyny Darıǵa Álmuratova.
Medısınalyq pýnktterdiń ashylý saltanatyna Shalqar aýdanynyń ákimi Janbolat Jıdehanov pen oblystyq densaýlyq saqtaý basqarmasy basshysynyń orynbasary Serik Tájiǵulov qatysty.
Eki nysan da zamanaýı medısınalyq-qural jabdyqtarmen jabdyqtalyp, qurylys barysynda ınklıýzıvtik talaptar qatań saqtaldy. Ásirese, qozǵalysy shekteýli turǵyndardyń erkin kirip-shyǵýyna da yńǵaıly etip salynǵan.
Aıta ketý kerek, qaıtarylǵan aktıvter qarajaty esebinen Aqtóbe oblysynyń eldi mekenderinde 11 medısınalyq ambýlatorııa qurylysy jobalanǵan. Qazirgi ýaqyttta 7 nysan paıdalanýǵa berilse, 4 nysannyń qurylysy aıaqtalýǵa jaqyn.
Aqtóbe oblysy