Qarasaı aýdanyndaǵy «Gulnar Baq» demalys ortalyǵynda maýsymnyń eń tartysty ári áserli jarystarynyń biri – «Almaty oblysynyń əkimi Kýbogyna arnalǵan eresekter arasyndaǵy komandalyq kókpar oblystyq lıgasynyń fınaldyq kezeńi» ótti. Shyǵys jáne Batys óńirleriniń eń myqty komandalary jarystyń basty trofeıi úshin sheshýshi kezdesý barysynda baq synasty, dep habarlaıdy Egemen.kz.
Komandalyq kókpar lıgasy – dástúrli ulttyq oıyn kókpardyń kásibı sport talaptaryna beıimdelgen zamanaýı sporttyq formaty. Jarystar eki komanda arasynda ótedi jáne oıynnyń belgilengen ýaqyty, tóreshilik, aıyp júıesi men aýysymdardy qamtıtyn biryńǵaı erejeler boıynsha júrgiziledi.
Dástúrli kókpardan aıyrmashylyǵy – komandalyq lıga oıyndy anaǵurlym dınamıkalyq ári taktıkalyq turǵyda jınaqy ótedi. Komandalardyń naqty quramy, bapkerleri men match júrgizý strategııasy bolady, bul oıynnyń kórnekiligin arttyryp, sportshylardyń daıyndyq deńgeıin kúsheıtedi. Komandalyq kókpar lıgasy aýdandyq, óńirlik jáne oblystyq deńgeılerde damyp, ulttyq at sportynyń tanymal bolýyna jáne Qazaqstannyń mádenı murasyn nyǵaıtýǵa yqpal etedi.
«Komandalyq kókpar lıgasy – ulttyq at sporty túrlerin damytýǵa baǵyttalǵan mańyzdy joba. Jalpy, oblys əkimdiginiń qoldaýy iri jarystar ótkizip qana qoımaı, ınfraqurylymdy damytýǵa, seksııalar ashýǵa, jastardy tartýǵa múmkindik beredi», dep atap ótti Almaty oblysy dene shynyqtyrý jáne sport basqarmasynyń basshysy Aqjúrek Tanatarov.
Oblystyq lıganyń fınaldyq kezeńi ulttyq sporttyń naǵyz merekesine aınaldy. Chempıon ataǵy úshin «Batys óńiri» atynan Qarasaı aýdany, Jambyl aýdany jáne Kemertogan (Qarasaı aýdany) aýyldarynyń quramalary, al «Shyǵys óńirinen» Kegen aýdany, Eńbekshiqazaq aýdany jáne Boleksaz (Kegen aýdany) aýyldarynyń úzdik komandalary baq synady. Tańsáriden bastap demalys ortalyǵynyń aýmaǵynda erekshe atmosfera ornady – ondaǵan jankúıer óz komandalaryn qoldaý úshin jınaldy. Kókpar alańy barlyq talaptarǵa saı daıyndalyp, tóreshiler alqasy ár kezdesýdiń ashyqtyǵy men ádil qadaǵalaýyna mán berdi.
«Ár komanda alańǵa maksımaldy daıyndyqpen shyqty. Fınaldyq kezeń sportshylarymyzdyń joǵary deńgeıin kórsetti. Kókparshylar naǵyz erlerge tán tartysty oıyn, keremet tehnıka jáne jeńiske degen jiger tanytty. Qýantatyny – kókparǵa degen qyzyǵýshylyq jyl saıyn artyp, týrnırlerdiń kásibıligi joǵarylap keledi», dedi jarystyń bas tóreshisi Sabıt Qasenov.
Matchtar aınalmaly júıede ótti, onda ár komanda ózderiniń taktıkalyq sheberligin, jyldamdyǵy men kúshin kórsetý múmkindigine ıe boldy. Ásirese, sheshýshi fınalǵa shyǵý taǵdyryn aıqyndaǵan qatar matchtar óte tartysty ótti.
Oıyn alańynyń ár metri úshin kúres júrip, oıynnyń qarqyny kórermenderdi sońǵy mınýtqa deıin tolqý ústinde ustady.
Nátıjesinde oryndar tómendegideı bólindi:
1 oryn – Jambyl aýdanynyń komandasy;
2 oryn – Bóleksaz aýylynyń komandasy (Kegen aýdany);
3 oryn – Qarasaı aýdanynyń quramasy.
«Bul fınalǵa uzaq daıyndaldyq. Qarsylastar óte kúshti boldy, ár oıyn ońaıǵa túsken joq. Jeńis – búkil komandanyń, shabandozdar men bapkerlik shtabtyń tynymsyz eńbeginiń nátıjesi. Jankúıerlerge qoldaýy úshin alǵys aıtamyz – ol bizge kúsh berdi», dedi Jambyl aýdany komandasynyń múshesi Tleshbaev Aqyljan.
Júldeli oryn alǵan komandalar gramotalarmen, medaldarmen, kýboktarmen jáne aqshalaı syılyqtarmen marapattaldy. Sondaı-aq alty túrli nomınasııa boıynsha jeńimpaz atanǵan oıynshylarǵa da syılyqtar tapsyryldy.
Uıymdastyrýshylar – Almaty oblysynyń dene shynyqtyrý jáne sport basqarmasy jáne oblystyq «Ulttyq sport túrleri boıynsha DRS» – kelesi jyly lıga formatty keńeıtýdi jáne qatysýshylar sanyn arttyrýdy josparlap otyrǵandaryn aıtty.