ASTANA. 21 aqpan. Qurlyqtyq hokkeı lıgasy aıasynda elordalyq «Barys» óz aıdynynda novokýzneskilik «Metallýrgty» qabyldap, 2:0 esebimen jeńiske jetti. Bul týraly egemen.kz habarlady.
Esep oıynnyń nebári 21-sekýndynda ashyldy. «Barystyń» qorǵaýshysy Maık Landın beıtarap aımaqtan joıqyn soqqy jasap, qarsylastar qaqpasyn nysanaǵa alyp kórdi. Áıtse de, shaıba qaqpadan asyp baryp, aıdyn jıegindegi qorǵannan keıin serpildi. Aıdyn ıelerinen mundaı jyldamdyq kútpegen «Metallýrg» qaqpashysy Andreı Kareev serpilgen shaıbany toqtata almaı eki aıaǵynyń arasynan ótkizip jiberdi. Der kezinde qajet jerden tabylǵan Brendon Bochınskı shaıbaǵa qaıta ıelik etip, qaqpashyny qapy qaldyrdy. Alǵashqy mınýtta munshalyqty óreskel qatelik jibergen «Metallýrg» qaqpashysy birden ornyn ózge áriptesine bosatyp berýge májbúr boldy. «Metallýrgtyń» bas jattyqtyrýshysy German Tıtov Kareevtiń ornyna Rafael Hakımovty shyǵardy. Astanalyqtardyń qaqpasyn alǵashqy mınýttan bastap Iаn Laso qorǵaǵanyn aıta keteıik.
Ýaqyt ótken saıyn «Barystyń» basymdyǵy artyp, qonaqtar qatelikterge jıi boı aldyra bastady. Oıynnyń 10-mınýtynda Evgenıı Blohın qos birdeı qorǵaýshynyń ortasynan Nıkıta Mıhaılıske pas shyǵaryp berdi. Nátıjesinde, qaqpashymen betpe-bet shyqqan Nıkıta tamasha goldyń avtory atanyp, esepti eseledi. Úziliske deıin esep ózgergen joq.
Ekinshi jáne úshinshi kezeńderde qos tarap ta qansha shabýyldaǵanymen, jankúıerler golǵa kýá bola almady. Osylaısha, «Barys» úshinshi oıyn qatarynan jeńiske jetip, QHL-dyń Shyǵys konferensııasynda 5-orynǵa kóterildi. Kelesi oıyndy 22 aqpan kúni óz aıdynynda novosibirlik «Sıbır» komandasyna qarsy ótkizedi.
Elaman Qońyr.
Derek: egemen.kz.
Sýret: hcbarys.kz.