Úkimet úıinde Premer-mınıstrdiń birinshi orynbasary Roman Sklıardyń qatysýymen «О́skemen armatýra zaýyty» AQ («О́AZ» AQ) men «Kaspıı Qubyr Konsorsıýmy-Q» AQ («KQK-Q» AQ) arasynda yntymaqtastyq týraly kelisimge qol qoıý rásimi ótti.
О́nerkásiptik jabdyqtyń ımportyn almastyrý jónindegi qujatqa «О́AZ» AQ bas dırektory Aleksandr Býdrıs pen Kaspıı qubyr konsorsıýmynyń bas dırektory Nıkolaı Gorban qol qoıdy.
Yntymaqtastyq bekitkish armatýranyń, sorǵy agregattary men elektr qozǵaltqyshtarynyń jergilikti óndirisin damytýǵa, magıstraldy munaı qubyry nysandarynda otandyq jabdyq qoldanýdy keńeıtýge, sondaı-aq qubyr armatýrasynyń qazaqstandyq iri óndirýshisi men munaı tasymaldaý ınfraqurylymyndaǵy negizgi operatorlarynyń arasynda ornyqty kooperasııany qalyptastyrýǵa baǵyttalǵan.
Kelisim sheńberinde taraptar «KQK-Q» AQ-ny óz elimizden shyqqan joǵary tehnologııalyq materıaldarmen, jınaqtaýshy bólshektermen ári jabdyqtarmen qamtamasyz etýge, jabdyqqa tehnıkalyq qyzmet kórsetýdi, jabdyqty jańǵyrtý men synaqtan ótkizýge, sondaı-aq ınnovasııalyq tehnologııalyq sheshimderdi birlesip ázirleýge nıetti.