Kóz ilestirmeı perne qýalatyp, daýys týdyratyn saýsaq dep oılaısyz ba? Keýdedegi rýh pen júrektiń qýaty sııaqty bizdińshe. Kúı ańyzyna aınalǵan «Saltanattyń» avtory Tólegen Mombekovti kórgender anandaı tompıǵan saýsaqtarymen apyraı osynshama ǵajaıyp kúı tógedi dep eshkim oılaı qoımas desedi. Sol Tólegen Mombekovtiń aldynan kúı úırenip, tálimin alǵan shertpe kúıdiń sheberi, ustaz Rymhan Ábilhanulyn eske alý keshinde onyń kúıshiligi men kisiligi týraly kókeıge qonarlyq áńgime kóp aıtyldy.
«Táttimbetten bastap beridegi Baýbek kúıshilerge deıingi shertpe kúı sheberleriniń týyndylaryn tereń tanyp, úzdik oryndaýshy osy Rymhan Ábilhanuly edi» dep bastady alqaly jıyndy dáýlesker kúıshi Janǵalı Júzbaev. Kúlásh Baıseıitova atyndaǵy Qazaq ulttyq óner ýnıversıtetinde «Dástúrli mýzykalyq óner» fakýltetiniń uıymdastyrýymen Ákim Tarazı zalynda ótken sharada Rymhan Ábilhanulynyń kúıshiligi, tálimgerlik qyry, adamdyq kelbeti birshama áńgimelendi. Kezinde ózi ekrannan sóılegende: «Mýzykadan joǵary turatyn kúı óneri – tilmen, áńgimemen aıtyp jetkize almaıtyn óner. Sózben jetkizsek, áńgime bolyp ketedi, poema, poezııa, pesa bolyp ádebı janrǵa aınalyp ketedi. Sol ádebı janrdyń kúshi jetpeıtin, tili jetpeıtin, adamnyń sezim qubylysynda bolyp jatqan alapat sezimdi, ishindegi daýyldardy qazaq kúı tilimen jetkizip otyrǵan. Mysaly, «Saltanat» kúıinde anasy qaıtys bolyp, balalardyń anasyn ańsap izdegeninde – búkil adamzatqa tán mahabbat, sheksiz súıispenshilik tunyp tur», depti.
Eske alý keshinde alashtanýshy ǵalym, jazýshy Tursyn Jurtbaı kúıshimen 20 jyl kórshi turǵanyn, kúıshiligimen qatar adamdyq ar-uıatyna kirshik túsirmeı ótken tektiligi týrasynda sóıledi. Memlekettik syılyqtyń laýreaty, jazýshy-dramatýrg Roza Muqanova naǵyz kúı qonǵan adam dep eske aldy.
Kezindegi respýblıkalyq «Kúı-kerýen» festıvaliniń «Altyn dombyra» ıegeri Rymhan Ábilhanuly 2015 jyly Londondaǵy qazaq ártisteriniń festıvalinde ónerimen áıgilengen. Qazaq televızııasy men radıosynyń «Altyn qorynda» «Kúıshi Rymhan Ábilhanuly» atty habar saqtaýly.
«Qazaqtyń kúı ónerine sheksiz úles qosqan, shertpe kúıdiń has sheberi, tálimger ustaz Rymhan Ábilhanuly «Otyrar sazy» folklorlyq etnografııalyq halyq aspaptar orkestrinde, L.N.Gýmılev atyndaǵy ýnıversıtette jáne Qazaq ulttyq óner ýnıversıtetinde kóp jyl jemisti eńbek etti, úzdik shákirtter daıarlady. Táttimbet, Súgir, Tólegen, Nurǵısa kúılerin nasıhattady. Ustazdyq jolyndaǵy jaýapkershiligi, adamdyq bolmysy qazaqtyń dástúrli kúı ónerine shynaıy berilgendigi biz úshin úlgi» dedi atalǵan ýnıversıtettiń dombyra kafedrasynyń meńgerýshisi, Qazaqstannyń eńbek sińirgen qaıratkeri Abylǵazy Ahmadıev. Sondaı-aq «Astana aqshamynyń» jýrnalısi Amanǵalı Qaljanov júrekjardy lebizin bildirse, kúıshiniń jary, belgili aqyn Ońaıgúl Turjan uıymdastyrýshylar men qatysýshylarǵa alǵys aıtty.