Aǵza múshelerin transplantasııaǵa alýǵa kelisý – marqumnyń týystaryna asa aýyr jaǵdaı, al ony kelesi naýqasqa ornalastyrý dárigerlerden erekshe kúsh-jiger, bilim-bilikti qajet etedi. Aqtaý qalasynda alǵash ret qaıtys bolǵan naýqastyń júregine donorlyq operasııa jasaldy.
Mańǵystaý oblystyq kópbeıindi aýrýhanasynyń baspasóz qyzmetiniń habarlaýynsha, oblystyq kópbeıindi aýrýhanasynda 45 jastaǵy er adamnyń mı ólimi anyqtalǵan soń, marqumnyń týystarymen oblys boıynsha transplantasııa jónindegi óńirlik úılestirýshi Indıra Amanqosqyzy men stasıonarlyq koordınator Ilııas Iýsýpuly qajetti túsindirý jumystaryn júrgizgen.
«Jaqyndary batyldyq tanytyp, donorlyqqa kelisim bergen soń aýrýhana bazasynda Densaýlyq saqtaý mınıstrliginiń Transplantattaýdy jáne joǵary tehnologııalyq medısınalyq qyzmetterdi úılestirý jónindegi respýblıkalyq ortalyǵy mamandarymen birlesip júrek alý operasııasy jasaldy», dep habarlaıdy oblystyq kópbeıindi aýrýhanasynyń baspasóz qyzmeti.
Operasııany Densaýlyq saqtaý mınıstrliginiń Transplantasııa ortalyǵynyń mamandary sátti júzege asyrýy nátıjesinde donordyń júregi uzaq ýaqyt kútý paraǵynda turǵan naýqasqa sátti transplantasııalanǵan.
– Bul – óńirimizdegi erekshe mańyzdy oqıǵa. Donorlyq mı óliminiń resmı rastalýynan keıin barlyq medısınalyq rásimder zańdy túrde oryndaldy. Biz donorlyqqa sheshim qabyldaǵan otbasyna shynaıy qurmet kórsetemiz, adam ómirin qutqarýǵa baǵyttalǵan izgi qadamdary úshin alǵys aıtamyz, – dedi oblystyq kópbeıindi aýrýhana dırektorynyń mindetin atqarýshy Berik Kaýnov.
Oblys boıynsha transplantasııa jónindegi óńirlik úılestirýshi Indıra Amanqosqyzynyń aıtýynsha, qazir jalpy kútý paraǵynda 175 mańǵystaýlyq bar. Onyń ishinde 165 eresek, 3 bala – búırek, 4 eresek, 1 bala – baýyr, 2 eresek júrek transplantasııasyna kezekte tur.
Mańǵystaý oblysy