Premer-mınıstrdiń orynbasary – Mádenıet jáne aqparat mınıstri Aıda Balaevanyń tóraǵalyǵymen Memleket basshysynyń tapsyrmasyna sáıkes, 2023 jyly bastalǵan «Aýylda densaýlyq saqtaýdy jańǵyrtý» ulttyq jobasyn iske asyrý barysy talqylandy.
Jıynǵa Densaýlyq saqtaý mınıstri Aqmaral Álnazarova, Ulttyq ekonomıka vıse-mınıstri Asan Darbaev, Indýstrııa jáne qurylys vıse-mınıstri Qýandyq Qajkenov sondaı-aq óńir ákimderi men ákim orynbasarlary onlaın rejimde qatysty. Kezdesýdiń negizgi taqyryby – bastapqy medısınalyq-sanıtarlyq kómek nysandaryn salý, ortalyq aýdandyq aýrýhanalardy jańǵyrtý jáne olardy bilikti kadrlarmen qamtamasyz etý baǵyttaryn qamtıtyn «Aýylda densaýlyq saqtaýdy jańǵyrtý» ulttyq jobasynyń iske asýy boldy. Búginde joba aıasynda salynady dep áýelden josparlanǵan 655 nysannyń 645-niń qurylysy aıaqtalǵan. Bul jospardyń 98%-yn quraıdy. Onyń ishinde 226 nysan buryn medısınalyq ınfraqurylym bolmaǵan aýyldarda salynǵan. Al 419-y eskirgen ǵımarattar ornyna turǵyzylypty. Sonymen qatar joba aıasynda qalǵan 10 BMSK nysany jyl sońyna deıin paıdalanýǵa beriledi. Aıda Balaeva oblys ákimdikterine qurylys-montaj jumystaryn, jobalyq jumystardy der kezinde aıaqtap, ákimshilik kedergilerdi joıýdy tapsyrdy.
«Barlyq baǵyt boıynsha qatań ári júıeli baqylaýdy qamtamasyz etý qajet. Ár oblys boıynsha bekitilgen grafıkti buljytpaı oryndap, barlyq kezeńinde qadaǵalaý jáne mindettemelerdiń tolyq oryndalýyna qol jetkizý mańyzdy. 2025 jyldyń qorytyndysy boıynsha baǵdarlama nátıjesine qatysty naqty ári tolyq aqparat berilýge tıis. 2026 jyl – jaýapty kezeń, sondyqtan formaldy esep emes, naqty nátıjeler men jergilikti jerdegi rastalǵan baqylaý qajet», dedi Premer-mınıstrdiń orynbasary.
Sonymen qatar jobanyń ekinshi baǵyty – ınsýlt ortalyǵy, TKA ortalyǵy, perınataldyq ortalyq, travmatologııa, hırýrgııa jáne medısınalyq ońaltý bólimsheleri bar 32 jańǵyrtylǵan ortalyq aýdandyq aýrýhanany paıdalanýǵa berý máselesi qaraldy. Baıandamaǵa sáıkes, 14 nysanda jumys aıaqtalǵan, taǵy 24 aýrýhana qaıta jańartý nemese kúrdeli jóndeý kezeńinde. Talqylaýda aýyldyq densaýlyq saqtaý nysandaryn medısınalyq kadrlarmen qamtamasyz etý mańyzdy máselelerdiń biri boldy. Ulttyq joba aıasynda 1100 medısına qyzmetkerin daıarlaý qarastyrylǵan.
«Infraqurylym salý – mańyzdy qadam, alaıda sheshýshi faktor – kadr máselesi. Nysandardyń tıimdi ári sapaly jumysy tikeleı medısınalyq mamandardyń daıarlyǵy men olardyń qoljetimdigine baılanysty. Búginde mamandar tapshylyǵy aýyldyq jerde ǵana emes, iri qalalarda da baıqalady. Medısınalyq nysandardy paıdalanýǵa berý personaldy tolyqtyrýdyń naqty algorıtmimen jáne kórsetiletin qyzmettiń kólemi men sapasyn naqty túsinýmen qatar júrýge tıis. Keıingi jyldardaǵy ekonomıkalyq qıyndyqtarǵa qaramastan, elimizde densaýlyq saqtaý júıesin damytýǵa aýqymdy ınvestısııalar salynyp jatyr. Bul jobalardyń nátıjesi barlyq syn-pikirlerge berilgen naqty jaýap. Sondyqtan nysandardy salýmen ǵana shektelmeı, olardyń qansha adamdy qamtıtynyn, qandaı naqty paıda ákeletinin halyqqa jetkizý mańyzdy. Azamattardyń densaýlyǵy – eldiń adam kapıtaly men strategııalyq áleýeti. Memleket qabyldap jatqan is-sharalardyń barlyǵy osyǵan baǵyttalǵan», dep atap ótti Aıda Balaeva.
Jıyndy qorytyndylaı kele, Premer-mınıstrdiń orynbasary birqatar tapsyrma berdi. Atap aıtqanda, jyl sońyna deıin jumysty aıaqtaýǵa tıis óńirler boıynsha qosymsha tekserý júrgizip, naqty baqylaý nátıjeleri týraly esep usynýdy; bekitilgen jumys kestelerin qatań saqtap, ár oblys boıynsha egjeı-tegjeıli jospar-grafıkterdi ázirlep, olardyń oryndalýyn turaqty baqylaýdy; birinshi, ekinshi jáne úshinshi baǵyttar boıynsha tolyq ári ýaqtyly jumys júrgizý, jyl sońyna deıin alynǵan mindettemelerdiń oryndalýyn qamtamasyz etý, ár jaǵdaı boıynsha mindetti túrde aqparat berýdi; 2025 jyldyń qorytyndysy boıynsha baǵdarlama nátıjeleri jóninde óńirler boıynsha naqty ári tolyq aqparat usynýdy tapsyrdy.