Sala ókilderiniń esebinshe, jalpy shyǵyn kólemi mıllıardtaǵan gonkong dollaryn quraýy múmkin. Tek qana órtengen páterlerdiń naryqtyq qunynyń ózi shamamen 5 mlrd gonkong dollaryna baǵalanyp otyr, bul – 642,3 mln AQSh dollaryna teń.
Alaıda, bul somaǵa áli de janama ekonomıkalyq shyǵyndar engizilmegen. Iаǵnı qaıǵyly oqıǵadan keıin qalada jyl saıynǵy «Hong Kong Cyclothon» velomarafony jáne 50 myń kórermenge arnalǵan jańa Kai Tak stadıonyndaǵy ánshi Karen Moktyń alǵashqy konserti keıinge qaldyrylǵan.
«Natixis Corporate and Investment Bank» ekonomısi Gerı Ng Chhek Iannyń pikirinshe, is-sharalar ındýstrııasyndaǵy úsh aptalyq úzilis shamamen 265 mln gonkong dollary (34 mln AQSh dollary) kóleminde qosymsha shyǵynǵa ákelýi múmkin.
Gonkong úkimeti zardap shekken turǵyndarǵa qarjylaı kómek pen ótemaqy tóleý tetikterin ázirlep jatyr. Qazirgi ýaqytta turǵyndarǵa kómek retinde 3,7 mlrd gonkong dollary (474 mln AQSh dollary) kóleminde qaıyrymdylyq qarajaty jınaldy.
Eske salsaq, 26 jeltoqsan kúni órt Taı Po aýdanyndaǵy segiz ǵımarattan turatyn «Wang Fuk Court» turǵyn úı kesheninen shyqty. Turǵyn úı kesheninde 2 myń páter bolǵan, onda 4600 adam turyp jatqan. Jergilikti bılik jalpy órt qurbandarynyń sany 159-ǵa jetkenin málimdedi.