Qazaqstan halqy Assambleıasy úshin mereıtoıly jyl elimizdegi qoǵamdyq kelisim men birlikti nyǵaıtýdyń erekshe kezeńi boldy. Memleket basshysy atap ótkendeı: «Birlik pen yntymaqtastyq, dıalog, ózara senim men qurmet, azamattyq jaýapkershilik – osy myzǵymas qaǵıdattardyń bári elimizdiń ilgerileýiniń negizin quraıdy». Bul sózder Assambleıanyń 30 jyldyǵyndaǵy qyzmetiniń mán-mańyzyn dál aıqyndaıdy.
Jyl mańyzdy oqıǵalarǵa, kezdesýlerge, bastamalarǵa toly bolyp, «beıbitshilik» pen «kelisim» uǵymdarynyń shynaıy maǵynasyn tereń túsinýge múmkindik berdi. Bul qundylyqtar etnomádenı birlestikterdiń, aqsaqaldar jáne analar keńesteriniń, ǵylymı qaýymdastyq ókilderiniń, shyǵarmashylyq ujymdardyń jáne belsendi jastardyń birlesken eńbegi arqyly kún saıyn nyǵaıyp jatyr. Osy san qyrly jumystyń júregi – kóptegen jyl boıy elordalyq Dostyq úıi bolyp keledi.
Astana turǵyndary úshin elordanyń atyn abyroımen alyp júrý – úlken mártebe. Al etnosaralyq kelisim salasynda qyzmet etetinder úshin bul mártebe táýelsizdiktiń basty qundylyǵy – beıbit ómirdi saqtaý jáne nyǵaıtý jolyndaǵy zor jaýapkershilikpen ushtasady. Jyl boıy elordalyq Assambleıa adamdardy ortaq jasampaz maqsattarǵa biriktiretin ınstıtýt retindegi mártebesin senimdi túrde dáleldedi. Assambleıa bastamalary áleýmettik, mádenı, bilim berý jáne aǵartýshylyq baǵyttarda júzege asyrylyp, halyqtyń ártúrli toptaryn qamtydy.
Mereıtoıly jyl aıtýly is-sharalardan jáne Assambleıa ardagerlerin ulyqtaýdan bastaldy. Dostyq úılerinde estelik taqtalar ashyldy. Ár etnomádenı birlestik jyl boıy ótetin merekelik sharalar josparyn ázirledi. Elorda Assambleıasynyń birqatar múshesi etnosaralyq kelisimdi nyǵaıtýǵa qosqan úlesi úshin qoǵamdyq marapattar men mereıtoılyq medaldarmen nagradtaldy. Bul – bizdiń qoǵamǵa degen kópjyldyq adal qyzmet pen tynymsyz eńbektiń joǵary baǵalanýy.
Jumystyń negizgi baǵyttarynyń biri qaıyrymdylyq qyzmeti boldy. Astana qalasy QHA janyndaǵy «Jomart jan» ortalyǵy qıyn jaǵdaıǵa tap bolǵan elorda turǵyndaryna kómekti jalǵastyrdy. Bıyl 16 myń adam qoldaý aldy, kórsetilgen kómek kólemi 63 mln teńgeni qurady. Bul jumys josparly jáne júıeli túrde júrgizilip, etnomádenı birlestikterge tán adamgershilik pen ózara qoldaýdyń joǵary deńgeıin kórsetedi.
Ádettegideı, qalalyq Assambleıa kópetnosty otbasylarǵa, kópbalaly analarǵa, Uly Otan soǵysynyń ardagerlerine, erekshe qajettilikteri bar balalarǵa jáne elorda eńbek ujymdaryna erekshe kóńil bóledi. Osy sanattardyń árqaısysyna baǵyttalǵan qoǵamdyq mańyzy bar jobalar júzege asyrylyp, senim, áleýmettik qoldaý jáne ózara túsinistik nyǵaıtyldy.
Dástúr boıynsha Dostyq úıinde Assambleıa ardagerlerin árdaıym qurmettep, olardyń keńesine qulaq asyp, josparlar sol tájirıbeli tulǵalardyń usynystaryna sáıkes úılestirilip otyrady. Jyl saıyn Qarttar kúninde ardagerlerdi qurmettep, áriptesterimen qaýyshýǵa múmkindik beriledi. Olar óz tájirıbesin, ómirden túıgen dana oılaryn kópshilikpen bólisetin «Assambleıa. Tulǵa. Taǵdyr» atty beınerolıkter serııasynyń jáne «Birlik Talks» podkasttarynyń keıipkerlerine aınaldy.
2025 jyl Dostyq úıiniń halyqaralyq deńgeıdegi qyzyǵýshylyq ortalyǵyna aınalǵan kezeń boldy. Oǵan shetelden mártebeli qonaqtar keldi: Izraıl Knessetiniń spıkeri Amır Ohana, Fransııa Ulttyq jınalysynyń depýtaty Brýno Fýks, Rýmynııa memlekettik hatshysy Djanına Sıtarý jáne Rýmynııa Mádenıet mınıstrligi memlekettik hatshysynyń orynbasary Irına Sanda Marın Kadjal. Bul saparlar elimizdiń etnosaralyq kelisim modeliniń halyqaralyq deńgeıde zor qyzyǵýshylyq pen qurmetke ıe ekenin aıqyn dáleldedi.
Assambleıa jumysynyń mańyzdy bóligi – jastar baǵytyn damytý. Bıyl otansúıgish, áleýmettik belsendi jas býyndy tárbıeleýge erekshe jaǵdaı jasaldy. Túrli jobalar arqyly jastar kóshbasshylyq qabiletterin damytyp, kóp tildi meńgerip, mádenı bastamalar men halyqaralyq baǵdarlamalarǵa qatysý múmkindigin aldy. Bul eldiń damýyna jaýapkershilikpen qaraıtyn bolashaq azamattardy qalyptastyrýǵa úles qosady.
Elorda shyǵarmashylyq ujymdary jyl boıy Astanany jáne jalpy memleketimizdi halyqaralyq alańdarda laıyqty tanytyp, etnomádenı ómirdiń baı palıtrasyn jáne joǵary deńgeıdegi mádenı qarym-qatynasty pash etti. Olardyń festıvaldar men konsertterge qatysýy mádenı dıalogti nyǵaıtyp, álemge kópetnosty qoǵamymyzdyń ásemdigin jáne alýan túrliligin kórsetti.
О́z aıasyn keńeıte otyryp, elordalyq Assambleıa kásiporyndarda Eńbek Assambleıa jelisin, sondaı-aq erekshe qajettilikteri bar azamattardy qoǵamdyq ómirge tartý úshin Inklıýzıvti Assambleıany jáne Sporttyq Assambleıany damytýǵa kiristi. Jańa ıdeıalar men jańa adamdardyń kelýi kelisim men tatýlyqty nyǵaıtý isinde jańa jobalar men aýqymdy nátıjelerge jol ashatyny sózsiz.
Jyl qorytyndysynda mereıtoı tek esep berý kezeńi ǵana emes, Assambleıanyń biregeı qoǵamdyq kelisim ınstıtýty retinde damýynyń mańyzdy belesi bolǵanyn atap aıtýǵa bolady. Assambleıa jyl boıy Memleket basshysy aıqyndaǵan turaqtylyqty, áleýmettik tutastyqty jáne ulttyq biregeılikti nyǵaıtý baǵytyn berik ustandy. Astananyń etnomádenı birlestikteri aldaǵy ýaqytta da osy mindetterdiń júzege asýyna mańyzdy úles qosa otyryp, etnosaralyq dıalog pen ózara yntymaqtastyqtyń negizgi ortalyǵy bolyp qala beredi.
Keler jyl qol jetkizilgen nátıjelerdi bekitip, jańa múmkindikter ákelip, elordamyzdyń ár shańyraǵynda beıbitshilik, kelisim jáne jasampazdyq atmosferasyn saqtasyn. «Tatýlyq – tabylmas baqyt» dep halyq danalyǵynda aıtylǵandaı, shynaıy baqyttyń ólsheýsiz qundylyǵy tatýlyq ekeni sózsiz!
Eset BAIKEN,
Astana qalasy ákiminiń orynbasary,
elordalyq Qazaqstan halqy Assambleıasy tóraǵasynyń orynbasary