Astanada «Qazaqtyń HHI ǵasyrdaǵy dástúri men qundylyqtary» atty biregeı tujyrymdamalyq jınaq kópshilikke tanystyryldy. Is-sharaǵa Senat tóraǵasy Máýlen Áshimbaev, depýtattar, ǵalymdar, sarapshylar, qoǵamdyq uıym ókilderi qatysty.
Máýlen Áshimbaev atalǵan rásimniń memlekettik mereke – Táýelsizdik kúni qarsańynda ótkizilýiniń rámizdik mánine nazar aýdaryp, bul kúnde bos naýqanǵa jol bermeı, tereń mazmun, durys qundylyqtar jáne uzaqmerzimdi baǵdardy dáripteýdiń mańyzy zor ekenin aıtty. Sondaı-aq ol kitaptyń ulttyq biregeılikti nyǵaıtý jáne jańa qoǵamdyq etıka qalyptastyrý jolyndaǵy erekshe róline toqtaldy. Senat tóraǵasy Memleket basshysy bul mańyzdy baǵyttarǵa únemi basa mán berip kele jatqanyn atap ótti.
«Biregeılik týraly búgingi suhbatymyz Prezıdent Qasym-Jomart Toqaev belgilep bergen ıdeologııalyq baǵdarmen tikeleı baılanysty. Memleket basshysy jańa qoǵamdyq etıka qalyptastyrýǵa, jaýapkershilik mádenıetin ilgeriletýge, «Zań men tártip» qaǵıdatyn damytýǵa jáne qoǵamǵa qyzmet etýge daıyn adal, bilimdi, kemeldengen – «Adal azamat» ıdeologııasyn nyǵaıtýǵa aıryqsha kóńil bólip keledi. Osy oraıda «Reformalar máni» serııasymen «Túrkistan» gazetine jarııalanǵan maqalam da atalǵan máselege arnalǵanyn aıta ketken jón. Maqalada qýatty memlekettik ınstıtýttarmen jáne turaqty ekonomıkamen qatar ulttyq biregeılik te Qazaqstannyń qazirgi tańdaǵy mańyzdy tirekteriniń biri ekenin aıtqan edim», dep Senat tóraǵasy aýqymdy zertteýler júrgizgen kitap avtorlaryna alǵys bildirdi.
Aıta keteıik, jańa jınaqtyń avtorlary – buǵan deıingi eńbekteri akademııalyq jáne qoǵamdyq dıskýrstyń mańyzdy bóligine aınalǵan belgili zertteýshiler. Olardyń qatarynda Senattyń jobalaryna, onyń ishinde Sarapshylar klýby men Taldaý mektebiniń jumysyna belsendi qatysyp júrgen Álıma Bısenova, Sultan Ákimbekov, Radık Temirǵalıev sekildi bilikti mamandar bar.
Is-sharada Máýlen Áshimbaev empırıkalyq derektermen qatar, tereń fılosofııa, mádenı jady jáne tarıhı sana jańa eńbektiń biregeıligin aıshyqtaı túsetinin tilge tıek etti. Sondaı-aq kitapta salt-dástúrler men shejire biregeıligi, kommemoratıvti tájirıbeler, otbasylyq qatynastardyń ózgerýi, qala ómiriniń jańa formalary, qundylyqtardyń qubylýy keńinen taldanǵanyn atap ótken jón. Mundaı taqyryptar oqyrmanǵa ulttyq mádenıettiń ómirsheń, kópqyrly jáne dınamıkalyq mánge ıe ekenin kórýge múmkindik beredi.