Táýelsizdik kúni qarsańynda Jetisý oblysynyń Lepsi aýylynda jataqhanasy bar jańa kópfýnksıonaldy sport kesheni paıdalanýǵa berildi. Endi bul keshende Lepsi sport mektebiniń tárbıelenýshileri turaqty túrde jattyǵady, dep jazady Egemen.kz.
Jańa nysannyń ashylý rásimine oblys ákiminiń orynbasary Dıas Esdáýletov, Májilis depýtaty Danııar Qasqaraýov, «ZHERSU» IPK baqylaý keńesiniń tóraǵasy, kásipker ári mesenat Baýyrjan Ospanov, sondaı-aq olımpıada chempıondary Ermahan Ybyraıymov, Iýrıı Melnıchenko, Nurbaqyt Teńizbaev, Nurbek Oralbaı, Demeý Jadyraev, Nazym Qyzaıbaı, Nurmahan Tynalıev jáne aýyl turǵyndary qatysty.
Saltanatty jıynda sóz sóılegen Dıas Esdáýletov óńir ákimi atynan jurtshylyqty jańa sport nysanynyń ashylýymen quttyqtap, sport salasyn damytýǵa baǵyttalǵan jumystarǵa toqtaldy.
«Memleket basshysynyń buqaralyq sportty damytý jónindegi tapsyrmasyna sáıkes, oblys qurylǵannan beri Jetisýda 32 jańa sport nysany salyndy, úsheýi kúrdeli jóndeýden ótti. Jyl sońyna deıin taǵy úsh sport nysanyn iske qosý josparlanyp otyr. Lepsi aýylynda ashylǵan keshen oqý-jattyǵý bazasy men jataqhanasy bir aýmaqta ornalasqan tolyqqandy sport ortalyǵy. Bul aýyl jastaryna jańa múmkindik berip, bolashaq chempıondardyń qalyptasýyna jol ashady dep senemiz», dedi ol.
Sport kesheni 160 adamǵa, al jataqhana 244 orynǵa shaqtalǵan. Nysan bıýdjet qarajaty esebinen salynǵan. Sonymen qatar «ZHERSU» IPK tarapynan jobaǵa kirmegen qosymsha sport jabdyqtaryn satyp alýǵa demeýshilik kómek kórsetilgen. Qazirgi tańda munda grek-rım jáne erkin kúres, boks, dzıýdo, shańǵy sport túrleri boıynsha seksııalar jumys istep tur. Bul seksııalarda 250 bala jattyǵady. Ázirge 10 jattyqtyrýshy eńbek etse, aldaǵy ýaqytta mamandar sany artpaq. Sonymen birge fýtbol, voleıbol jáne basketbol seksııalaryn ashý josparlanǵan.
Kópfýnksıonaldy sport kesheni tórt negizgi bloktan turady. Onda tatamıi bar kúres zaly, jekpe-jekke arnalǵan arnaıy zal, voleıbol men basketbolǵa arnalǵan oıyn zaldary, trenajer zaly, dýsh jáne kıim aýystyratyn bólmeler, dáriger, psıholog, massaj kabınetteri, konferens-zal, ashana, sondaı-aq ákimshilik jáne qosalqy bólmeler tolyq qarastyrylǵan.
Aýyl turǵyny Asqar Havkeı jańa sport mektebiniń ashylýyna rızashylyǵyn bildirdi. Onyń aıtýynsha, keshende balalardyń sportpen shuǵyldanýyna jáne densaýlyǵyn nyǵaıtýyna barlyq jaǵdaı jasalǵan.
Al jas sportshy Janat Kenjebaıuly jańa jattyǵý zalynyń alǵashqy kelýshileriniń biri bolǵanyn atap ótti. Ol buryn dzıýdomen aýyl mektebinde aınalysqanyn, endi jańa keshenniń múmkindigi mol ekenin aıtty.
Oblys ákimdiginiń málimetinshe, búginde Jetisýdyń qala jáne aýdan sport mektepterinde 23 myńnan astam bala men jasóspirim sporttyń 61 túrimen shuǵyldanady. Al óńir halqynyń 42 paıyzy dene shynyqtyrýmen jáne sportpen turaqty aınalysady.