Kelissiz minez negizsiz jaǵdaıǵa ákelip soqtyrdy. Aqtaý qalasymen oǵan japsarlas Prıozernyı aýylyn jalǵaıtyn jol boıynda taıaýda oqys oqıǵa oryn aldy.
Jol boıynda qatty jyldamdyqpen júıtkip kele jatqan «VAZ-21110» kóliginen boıjetken sekirip ketti. Kólikti dereý toqtatqan júrgizýshi jigit qulap jatqan qyzǵa júgirip kelip kómek kórsete bastady. Iаǵnı, qyzdyń tiri, ári qatty jaraqaty kórinbegendikten jalynyp-jalpaıyp júrip kóndirip, kólikke qaıta otyrǵyzyp alyp jaıyna ketken. Sol betimen júrip otyryp, qyzdy óziniń jumys ornyna – Aqtaý qalasyndaǵy shaǵyn aýdandardyń birindegi mektepke ákelip tastaıdy. Mektepke kelgen soń qyzdyń ózi «Jedel járdem» shaqyrtady. Dárigerler Mańǵystaý oblystyq aýrýhanasynyń travmatologııa bólimine jatqyzylǵan qyzdyń ártúrli dene jaraqattaryn alǵandyǵyn aıtty. Sóıtsek, oqıǵa bylaı órbipti. Kóliktegi ekeý ózara kelispeı, aralarynda urys-keris týyndaıdy, tipti sońy tóbeleske ulasa jazdaıdy. Osy sátte jolaýshylar jaǵyndaǵy aldyńǵy oryndyqta otyrǵan qyz janjaldy toqtatýdyń joly osy dedi me, álde minezge erik berdi me, áıteýir kóliktiń esigin ashyp, sekirip ketedi. Abyroı bolǵanda, qyz aman qaldy. Sekirýdiń mashaqaty bylaı tursyn, jazym bolaıyn dese, jan-jaqtan zaýlaǵan ózge kólikterdiń astynda qalý qaýpi de bolmaı qalýy ǵajap emes edi. Urys-keris, minez sabyrdan taıdyrdy, biraq Qudaı myqtap saqtady...
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.