Májilis depýtaty Aıdos Sarym áleýmettik jelilerde Kaspıı qubyr konsorsıýmynyń termınalyna jasalǵan shabýyldy qoldaǵan azamattardy jaýapqa tartýdy talap etti, dep habarlaıdy Egemen.kz.
Buǵan deıin áleýmettik jeli qoldanýshylary strategııalyq mańyzy bar memlekettik ınfraqurylymǵa jasalǵan shabýyldardy ashyq túrde aqtaǵan. Májilis depýtatynyń pikirinshe, mundaı áreketter sóz bostandyǵyna beriletin konstıtýsııalyq quqyq sheginen asyp, ulttyq múddelerge naqty zııan keltiredi.
Aıdos Sarym Bas prokýratýradan atalǵan jarııalanymdarǵa quqyqtyq baǵa berip, olardy terrorızmdi nasıhattaý (QR QK 256-bap) nemese memlekettik opasyzdyq (QR QK 175-bap) retinde qarastyrýdy surady.
Sonymen qatar, depýtat halyq arasynda túsindirý jumystaryn júrgizip, munaı qubyrlary men eldiń ekonomıkalyq qaýipsizdigi úshin asa mańyzdy ózge de ınfraqurylym nysandaryn joıýǵa shaqyratyn aqparatty taratpaý kerektigin túsindirýdi usyndy.
Aıta keteıik, Kaspıı qubyr konsorsıýmy – Qazaqstan munaıyn eksporttaýdyń negizgi baǵyty. El jyl saıyn osy qubyr arqyly keminde 60 mıllıon tonna munaı jóneltedi. Qazirgi ýaqytta Qazaqstan shabýyldan keıingi shyǵyndardy eseptep jatyr. Energetıka mınıstri Erlan Aqkenjenovtiń aıtýynsha, shabýyl saldarynan kem degende 480 myń tonna munaı óndirilmeı qalǵan.
Eske salsaq, 29 qarashada Astana ýaqytymen 06:06-da Novorossıısk porty aýdanynda KQK-nyń teńiz ınfraqurylym nysandaryna ekıpajsyz júzý quraldary arqyly shabýyl jasalǵan edi. Nátıjesinde teńizdegi qashyqtaǵy aılaq qondyrǵysy VPÝ-2 (qalqymaly tıeý qurylǵysy) aıtarlyqtaı zaqymdaldy. Ermek Kósherbaev KTK-ǵa jasalǵan shabýyldy Ýkraına tarapymen talqylady. Energetıka mınıstri Erlan Aqkenjenov KTK-ǵa tolyqqandy balama joq ekenin, al ózge baǵyttar tek júktiń belgili bir bóligin ǵana tasymaldaı alatynyn aıtqan edi.