Kópsalaly keshen paıdalanýǵa berildi

Jetisý oblysy qu­ryl­ǵaly osymen ondaǵan aýylda osyndaı zamanaýı sport nysany ashylyp otyr. Qazaqtyń qaradomalaq balalary sporttyq úıirmege qa­tysamyz dep Alakól aýdanynyń ortalyǵy Úsharal qalasy men Tal­dyqorǵanǵa sabylatyn. Onda da shamasy jetkender ǵana balasyn sport mekemelerine aparatyn. Júzdegen shaqyrym jer júrý ońaı emes. Endi, mine, irgede halyqaralyq standartqa saı, barlyq jaǵdaı jasalǵan jańa ǵımarat boı túzedi. Bul nysannyń ıgiligin Lepsi sport mektebiniń balalary paıdalanatyn bolady.

Jańa keshenniń ashylýyna oblys ákiminiń orynbasary Dıas Esdáýletov, «ZHERSU» ınves­tısııalyq-ónerkásiptik korporasııasy Baqylaý keńesiniń tóraǵasy, kásipker, mesenat Baýyrjan Ospanov, Májilis depýtaty Danııar Qasqaraýov, Olımpıada chempıondary men júldegerleri Ermahan Ybraıymov, Iýrıı Melnıchenko, Nurbaqyt Teńizbaev, Nurbek Oral­baı, Demeý Jadyraev, Nazym Qyzaıbaı, Nurmahan Tynalıev, basqa da belgili sportshylar, aýyl turǵyndary qatysty.

Saltanatty sharada D.Esdáý­letov oblys ákiminiń quttyqtaýyn jetkizip, óńirdegi sport salasyn damytý baǵytynda jasalyp jatqan jumystarǵa qysqasha toqtaldy.

«Memleket basshysynyń buqa­ralyq sportty damytý jónin­degi tapsyrmasyna sáıkes oblys qurylǵannan beri 32 jańa sport nysany salyndy, 3 nysan kúrdeli jóndeýden ótti. Jyl sońyna deıin taǵy 3 sport nysanyn iske qosý jos­parlanyp otyr. Lepsi aýylynda ashylǵan bul keshen – oqý-jattyǵý bazasy men jataqhanasy bir aýmaqta ornalasqan tolyqqandy sporttyq ınfraqurylym. Ol aýyl jastaryna zor múmkindik týdyryp, bolashaq chempıondardyń ósip shyǵýyna jol ashady dep senemiz»,  dedi ol.

Bıýdjet qarjysyna salyn­ǵan nysan 160 oryndyq, jataqha­nasy 244 orynǵa arnalǵan. Kóp­fýnksıonaldy sport kesheni tórt negizgi bloktan turady. Keshen qura­mynda tatamı tóselgen kúres zaly, jekpe-jekke arnalǵan maman­dandyrylǵan zal, voleıbol men basketbolǵa arnalǵan oıyn zaldary, trenajer zaly, jýyný, kıim aýys­tyrý bólmeleri, dáriger kabıneti, massaj bólmesi, psıholog kabıneti, májilis zaly, basqa da ákimshilik, qyzmettik bólmeler qarastyrylǵan. Sondaı-aq «ZHERSU» IО́K joba aıasynda qarastyrylmaǵan qosymsha qural-jabdyqtardy satyp alýǵa demeýshilik kómek kórsetti.

Qazir sport mektebinde sport­tyń bes túrinen – grek-rım kúresi, boks, erkin kúres, dzıýdo, shańǵy­men syrǵanaýdan 150 talapty jasós­pirimdi 10 jattyqtyrýshy jat­tyq­tyrady. Aldaǵy ýaqytta sport­tyń fýtbol, basketbol, voleıbol túrlerinen jattyqtyrýshylar tartý josparlanyp otyr.

Osyǵan deıin Qaratal aýdanyna qarasty Baıshegir aýyldyq okrýginde osyndaı irgeli sport kesheni salynǵan edi. Oblys orta­lyǵynan alysta ornalasqan aýylda júzdegen bala sportpen erkin aınalysyp jatyr.

Aıta ketelik, oblystaǵy sport mektepterinde 23 myńnan astam tárbıelenýshi sporttyń 61 túrimen shu­ǵyldanady. О́ńirde deneshy­nyqtyrý, sportpen aınalysatyn adamdar oblys halqynyń 42%-yn quraıdy.

Jetisý oblysy