Memleket basshysy Qasym-Jomart Toqaev «Bilim keleshegi: adal azamat, kásibı maman» atty bıylǵy tamyz konferensııasynda qazir – bilim men ǵylymnyń zamany ekenin erekshe aıtqan edi.
«Jahandaný dáýirinde ozyq bilimdi ıgergen, jańa tehnologııany meńgergen eldiń upaıy túgel bolady. Búgin sanaly urpaq tárbıeleı alsaq, erteń zaman kóshiniń basynda júremiz. Sondyqtan osy salany qoldaý memlekettik saıasattyń negizgi basymdyǵy bolyp qala beredi. Keıingi jyldary bul baǵytta aýqymdy jumys atqaryldy. 2019 jyldan beri bilim salasynyń bıýdjeti úsh ese artty. Osy ýaqytta 1 mıllıonnan astam oqýshyǵa arnalǵan 1200 mektep ashyldy. «Keleshek mektepteri» ulttyq jobasy aıasynda jalpy sany 217 mektep qurylysy josparlandy. Qazir 128 mektep salyndy. Budan bólek, Bilim berý ınfraqurylymyn qoldaý qorynyń qarjysyna alpystan astam mektep ashyldy. Taǵy 30-ǵa jýyǵy salynyp jatyr», degen bolatyn el Prezıdenti.
Shynynda, «Keleshek mektepteri» – zamanaýı tehnologııaǵa negizdelgen, oqýshynyń jeke qabiletin damytýǵa baǵyttalǵan ınnovasııalyq bilim ordasy. Munda sıfrlyq ınfraqurylym, jańa pedagogıkalyq tásilder jáne oqýshynyń saýattylyǵyn kúsheıtýge arnalǵan tıimdi oqytý ádisteri qoldanylady. О́z kezeginde ınteraktıvti oqý modýlderi, jasandy ıntellekt júıeleri, zerthanalyq ortalyqtar men shyǵarmashylyq keńistikter bilim sapasyn jaqsartýǵa múmkindik beredi. Negizinde «Keleshek mektepteri» oqýshynyń jan-jaqty damýyn, alǵan bilimin naqty tájirıbemen ushtastyryp, bolashaqta paıdasy tıer kásibı baǵdar alyp shyǵýyn kózdeıdi. Sondaı-aq jańa býyn mektepteri bilim berý úderisinde qaýipsiz, orta qalyptastyryp, oqýshylardyń ǵylymı-zertteý daǵdylaryn erte jastan damytýǵa jaǵdaı jasaıdy. Kreatıvti oılaý, sıfrlyq mádenıet dál osy mektepter ustanatyn basty baǵyt sanalady.
Respýblıkanyń úshinshi megapolısinde de Prezıdent tapsyrmasymen birneshe «Keleshek mektebi» boı kóterdi. Solardyń biri – Shymkenttiń Ál-Farabı aýdanynda ornalasqan, bıyl qańtar aıynda esigin aıqara ashqan №148 «Keleshek mektebi».
«Alǵashynda 691 oqýshymen balalardy oqyta bastaǵan bilim ordasynda búgingi tańda myń bala bilim alyp jatyr. Bir aýysymda oqıtyn oqýshylardyń bos ýaqytyn tıimdi uıymdastyrý úshin mektepishilik birneshe úıirme jumys isteıdi. Atap aıtqanda, fýtbol, voleıbol, ústel tennısi, doıby, debat oıyndary bar. Al bastaýysh synyp oqýshylary qýyrshaq teatryna nemese bı men sýret úıirmelerine qatysady. Sonymen qatar muǵalimder joǵary synyp oqýshylaryn sahna ónerine baýlýmen aınalysady. Jalpy, «Keleshek mektepteri» – Memleket basshysy Qasym-Jomart Toqaevtyń bastamasymen qolǵa alynǵan aýqymdy ulttyq joba. «Keleshek mektepteriniń» bir ereksheligi – ondaǵy synyptar keń ári jaryq bolady, sondaı-aq, zamanaýı zerthanalar, ádemi kitaphanalar men jaıly sport zaldary, qaýipsiz oıyn alańdary bul bilim uıasyn basqa mektepterden daralap turady. Mundaı jaıly orta balanyń bilimge qushtarlyǵyn oıatary sózsiz. Bir sózben aıtqanda, «Keleshek mektebinde» oqýshynyń alańsyz bilim alýyna bar jaǵdaı jasalǵan», dedi №148 «Keleshek mektebiniń» dırektory Uljalǵas Baqtııarqyzy.
Mektep basshysynyń aıtýynsha, qazirgi zamannyń qarqyndy damýy bilim berý júıesine jańa talaptar qoıyp otyr. Ásirese oqýshylardy bolashaq mamandyqqa erte baǵyttaý – olardyń qyzyǵýshylyǵy men qabiletin ýaqtyly anyqtaýda mańyzdy rólge ıe. Sol sebepti bilim uıasynda robottehnıka, hımııa, bıologııa sabaqtary zamanaýı turǵyda jabdyqtalǵan zerthanalar bar. Odan bólek, mekteptegi zerthanalar ınteraktıvti panel, qaýipsiz hımııalyq quraldar, bıologııalyq mıkroskoptar, robot qurastyrýǵa arnalǵan modýl jáne baǵdarlamalaý platformalarymen tolyq qamtamasyz etilgen. Sol úshin oqýshy tek teorııalyq bilim alyp qana qoımaı, tájirıbe jasap, ǵylymı-zertteý daǵdylaryn jetildire alady. Joǵaryda aıtylǵan robottehnıka sabaǵynda oqýshylar robot qurastyryp, olardyń qozǵalysyna baǵdarlama túzedi, robot jasaýda túrli sensorlar qoldanady. Bul pán birinshiden, logıkalyq oılaý qabiletin damytady, ekinshiden, ınjenerlik máselelerdi sheshýge, toppen birge jumys isteýge úıretedi deıdi pedagog. Robottehnıkamen aınalysqan balalar bolashaqta IT, ınjenerııa, avtomatıka jáne jasandy ıntellekt salalaryn erkin meńgergen maman bolyp shyǵady.
Sondaı-aq JI kómegimen hımııa zerthanalarynda oqýshylar eritindilerdi daıyndap, reaksııalardyń júrý jyldamdyǵyn zerttep, zattardyń qasıetin anyqtaıdy. Mundaı tájirıbeler arqyly olar ǵylymı dáldikke úırenedi, zertteý ádisterin meńgerip, ekologııalyq saýatyn ashady. Hımııaǵa qyzyqqan oqýshy keleshekte medısına, farmasevtıka, ekologııa, hımııalyq tehnologııa mamandyqtaryna tańdaý jasaıtyny belgili. Al bıologııa zerthanalary mıkroskopııalyq zertteýlerge, DNQ modelderimen jumys isteýge, ekologııalyq úderisterdi baqylaýǵa múmkindik beredi. Bul sabaqtar tabıǵat qubylysyn ǵylymı turǵydan túsindiredi. U.Baqtııarqyzynyń pikirinshe, bıologııa páni oqýshylardyń boıynda bıotehnologııa, genetıka, medısına ǵylymyna degen qyzyǵýshylyǵyn oıatady. Qysqasy, balanyń ishki qabiletin ashýǵa «Keleshek mektebinde» bar múmkindik qarastyrylǵan.
ShYMKENT