Qyzylordadaǵy kópbeıindi oblystyq balalar aýrýhanasy janynan «Qamqorlyq» ortalyǵy ashyldy. Ortalyqtan shala týylǵan, nevrologııalyq, ortopedııalyq belgilermen dúnıege kelgen úsh jasqa deıingi sábıler kómek ala alady.
Ortalyqtyń ashylý saltanatynda oblys ákiminiń orynbasary Meırambek Shermaǵanbet óńirde memleket bıýdjetinen bólek, túrli qorlar tarapynan túrli áleýmettik nysandar boı kóterip kele jatqanyn atap ótti. «Samuryq-Qazyna» AQ basqarýshy dırektory Ǵıbrat Aýǵanov osy nysan elimizde «Samuryq-Qazyna» qorynyń qoldaýymen iske qosylǵan 47-ońaltý ortalyǵy ekenin aıtty.
«Qor seriktesterimen birlese otyryp, bes jyl ishinde elimizde osyndaı ortalyqtarǵa degen qajettilikti tolyq qamtamasyz etti. Bul ortalyqtarda jyl saıyn 12 myńǵa jýyq múgedektigi bar bala keshendi medısınalyq kómek alady. Nátıjesinde, 6,3 myńnan astam erekshe bala alǵashqy qadamyn jasap, 8,6 myń sábıdiń tili shyqty. Ońaltýmen birge, ınklıýzıvti bilim men áleýmettendirý baǵytynda qor elimiz kóleminde 26 ınklıýzııa kabınetin ashty», dedi Ǵ.Aýǵanov.
«Qazaqstan halqyna» qoǵamdyq qorynyń ókili Shyńǵys Sharapıevtiń aıtýynsha, úsh jyl ishinde qor oblysta quny 10 mlrd teńgeden asatyn áleýmettik jobalardy júzege asyrdy. Ashylý saltanatynda «Qamqorlyq» korporatıvtik qorynyń dırektory Araılym Erkinova da bastamaǵa sáttilik tiledi.
Jańa ortalyqqa «Samuryq-Qazyna», «Qazaqstan halqyna» qorlarynyń qoldaýymen álemdik óndirýshilerdiń zamanaýı ońaltý jabdyqtary jetkizilip, mamandar «Qamqorlyq» qorynyń demeýimen Astana qalasyndaǵy ulttyq balalardy ońaltý ortalyǵynda daıyndyqtan ótken. Sensorlyq, shýngıttik bólmeler, tuzdy shahta, ımmersıondy vannalar men túrli zamanaýı jabdyqtar sábıdi syrqatynan erte aıyqtyryp, ońaltý baǵdarlamasyn sapaly júrgizýge sep bolady.
Jyl saıyn 3 jasqa deıingi 600 balany qabyldaıtyn ortalyqta árbir balaǵa jeke ońaltý jospary ázirlenedi. Mýltıdıssıplınarlyq júıege negizdelgen mekemede balamen nevropatolog, reabılıtolog, neonatolog, jattyǵý terapııasynyń nusqaýshysy, logoped, defektolog, psıholog jumys isteıdi.
QYZYLORDA