Kıberqylmys, ekstremızm, esirtki trafıgi – adamzattyń eń aýyr dert-merezi. Bul qaýipter bir eldiń yjdaǵatymen joıylmaıdy. Qazaqstan men Saýd Arabııasy dál osy shyndyqty eskerip, qaýipsizdik salasynda jańa, tehnologııalyq formatty iske qosty, dep jazady Egemen.kz.
Ishki ister mınıstri Erjan Sadenov Saýd Arabııasy Koroldiginiń Ishki ister mınıstri Abdýl-Azız ben Saýd ben Naıfa Ál Saýdtyń shaqyrýymen Er-Rııad qalasyna resmı saparmen bardy.
Sapar aıasynda ekijaqty kezdesý ótip, taraptar qoǵamdyq qaýipsizdikti qamtamasyz etý jáne transulttyq qylmysqa qarsy is-qımyl salasyndaǵy ózekti máseleler men yntymaqtastyqty keńeıtý perspektıvalaryn talqylady.
Uıymdasqan qylmystyq toptarǵa, esirtki quraldarynyń zańsyz aınalymyna, ekstremızm men kıberqylmysqa qarsy kúrestegi ózara is-qımylǵa, sondaı-aq izdeýdegi tulǵalardy anyqtaý jáne quqyq qorǵaý qyzmetindegi ozyq tájirıbelermen almasý máselelerine erekshe nazar aýdaryldy.
Kelissózder qorytyndysy boıynsha taraptar qol jetkizilgen ýaǵdalastyqtardy iske asyrýǵa jáne odan ári yntymaqtastyq qadamdaryn úılestirýge baǵyttalǵan praktıkalyq ózara is-qımyl máseleleri jónindegi birlesken komıssııa qurýǵa daıyn ekendikterin bildirdi.
Sapar barysynda qazaqstandyq delegasııa Saýd Arabııasy Koroldiginiń Ishki ister mınıstrliginiń jedel basqarý jáne jasandy ıntellektti damytý ortalyqtarynyń, arnaıy bólimsheleriniń qyzmetimen, sondaı-aq Naıf atyndaǵy Qaýipsizdik ǵylymdary ýnıversıtetiniń bilim berý jáne ǵylymı áleýetimen tanysty.
Bul sapar Qazaqstan men Saýd Arabııasynyń quqyq qorǵaý organdary arasyndaǵy seriktestikti odan ári nyǵaıtýǵa jáne praktıkalyq ózara is-qımyldy damytýǵa, onyń ishinde jasandy ıntellekt tehnologııalaryn damytý jáne qoldaný, kadrlar daıarlaý, sondaı-aq basqa da salalarda tájirıbe almasýǵa eki taraptyń da múddeli ekenin rastady.