Batys Qazaqstan oblysy Oral qalasynda «Keleshek mektepteri» ulttyq jobasy aıasynda 600 oryndyq jańa mektep ǵımaraty paıdalanýǵa berildi, dep habarlaıdy Egemen.kz.
Oral qalasynyń Zashaǵan kentinde Memleket basshysy Qasym-Jomart Toqaevtyń tapsyrmasyna sáıkes júzege asyrylyp jatqan «Keleshek mektepteri» ulttyq jobasy aıasynda 600 orynǵa arnalǵan jańa bilim berý uıymy paıdalanýǵa berildi. Bul osy joba aıasynda Oral qalasynda salynǵan úshinshi mektep.
Mekteptiń ashylý saltanatyna Batys Qazaqstan oblysynyń ákimi Narıman Tóreǵalıev, oblystyq bilim basqarmasynyń basshysy Eldos Safýllın, oblystyq máslıhat depýtattary, bilim salasynyń ardagerleri, mektep dırektorlary, merdiger uıym ókilderi, ata-analar men oqýshylar qatysty.
«Memleket basshysy Qasym-Jomart Toqaev «Bilimdi ári sanaly urpaq tárbıeleý – asa mańyzdy memlekettik mindet» degen bolatyn. «Keleshek mektepteri» jobasy óskeleń urpaqqa jasalǵan úlken qamqorlyqtyń jarqyn úlgisi» dedi óz sózinde oblys ákimi.
600 orynǵa eseptelgen jańa bilim oshaǵynda 33 oqý kabıneti, dızaın-tehnologııa, robototehnıka, ınklıýzıvti bilim berý kabınetteri, horeografııa zaly, shyǵarmashylyq jáne tehnıkalyq baǵyttaǵy sheberhanalar jumys istep tur. Sonymen qatar, eki sport zaly, zamanaýı kitaphana, birneshe kovorkıng alańy, 130 oryndyq akt zaly jáne 176 oryndyq ashana tolyq jumys isteýge daıyn.
Jańa mekteptiń ashylýyna qýanǵan jan kóp. О́ıtkeni osy óńirdegi Á.Moldaǵulova atyndaǵy №38 mektep-lıseıi úsh aýysymda jumys istep turǵan bolatyn. Buıyrsa jańa mektepke 1272 oqýshy kóshirilip, 91 pedagog aýysady dep josparlanǵan.
Aıta keteıik, sońǵy úsh jylda oblysta 9806 orynǵa arnalǵan 28 mektep salyndy. Onyń ishinde «Keleshek mektebi» jobasy aıasynda 6900 oryndyq 7 mektep paıdalanýǵa berildi.