Endi táýelsizdik jyldarynda berilgen dıplomdardyń túpnusqasyn tekserýge bolady. Bul nege mańyzdy? Keıingi kezde jalǵan qujat máselesi kún tártibinen túspeı tur. Kúni keshe Ǵylym jáne joǵary bilim mınıstrligi búginde 46 jalǵan dıplom jasaýmen aınalysqan 20 ınternet-resýrs anyqtalǵanyn, materıaldar Ishki ister mınıstrligi men Mádenıet jáne aqparat mınıstrligine joldanǵanyn habarlady.
Qazir ınternet keńistiginde jalǵan dıplomdar týraly túrli aqparat keńinen taralyp jatyr. Zańsyz qujat aınalymynyń aldyn alý maqsatynda Ǵylym jáne joǵary bilim mınıstrligi 1991 jyldan beri berilgen dıplomdardyń derekter bazasyn qurdy. Osy rette mınıstrlik bilim týraly qujattardyń ózindik úlgisiniń mazmunyna qoıylatyn negizgi talaptardy, sondaı-aq joǵary oqý oryndary túlekterine arnalǵan osyndaı qujattardyń serııalaryn bekitti. Dıplomdar arnaıy modýl arqyly biregeı nómirler men QR-kodtar berý jolymen jasalady. Júıege qol jetkizý quqyǵy osy modýlde tirkelgen, resmı túrde jaýapty ýnıversıtet qyzmetkerlerine ǵana beriledi.
Dıplomdardy generasııalaý «Joǵary bilim berýdiń biryńǵaı platformasy» (JBBP) aqparattyq júıesindegi bilim alýshylar týraly derekter negizinde júzege asyrylady. Eger bilim alýshy týraly aqparat JBBP-da bolmasa, dıplom nómirin qalyptastyrý múmkin emes. О́zindik úlgidegi bilim týraly qujattarda generasııalanǵan biregeı nómir men QR-kod bolmaǵan jaǵdaıda mundaı qujattar jaramsyz dep tanylady.
Sonymen qatar Mádenıet jáne aqparat mınıstrligi men Ishki ister mınıstrligi jalǵan dıplomdardy daıyndaý jáne satý faktilerin turaqty túrde baqylap, toqtatyp otyrady. Qylmystyq kodekstiń 385-babyna sáıkes jalǵan qujattardy jasaý nemese qoldaný aıyppul salýǵa, túzeý jumystaryna nemese eki jylǵa deıin bas bostandyǵyn shekteý ıakı aıyrýǵa ákep soǵady.
Osyǵan oraı joǵary oqý oryndary derekterdi sıfrlandyrý jumysyn jalǵastyrady, al jumys berýshiler dıplomnyń túpnusqalyǵyn https://epvo.kz servısi arqyly teksere alady. Dıplomnyń elektrondy nusqasy elektrondy úkimettiń («Sıfrlyq qujattar») mobıldi qosymshasynda da qoljetimdi.