Memleket basshysy Qasym-Jomart Toqaev mamyr aıynda Bala quqyqtary jónindegi ýákil Dınara Zákıevany qabyldap, balalardyń quqyqtaryn qorǵaý salasyndaǵy ózekti máseleler týraly aqparat alǵan bolatyn, dep jazady Egemen.kz.
Qazaqstanda balalardyń quqyqtaryn qorǵaý júıesin kúsheıtý baǵytynda jańa ınstıtýsıonaldyq qadam jasalýda. Atap aıtqanda, oblys ákimdikteri janynan bala quqyqtaryn qorǵaý jónindegi derbes basqarmalar qurý jumystary qolǵa alyndy. Bul qurylymdar óńirlik deńgeıde balalardyń qaýipsizdigine, quqyqtarynyń saqtalýyna jáne aldyn alý sharalarynyń tıimdi iske asýyna tikeleı jaýapty bolady.
Sońǵy jyldary balalarǵa qatysty zorlyq-zombylyq, sýısıd jáne jasóspirimder arasyndaǵy quqyqbuzýshylyq máselesi erekshe alańdaýshylyq týǵyzyp otyr. Osyǵan baılanysty balalardyń quqyqtaryn qorǵaý salasynda zańnamalyq jáne uıymdastyrýshylyq ózgerister júzege asyrylýda. Bala quqyqtary jónindegi ýákildiń bastamasymen sońǵy eki jylda qoldanystaǵy zańnamaǵa 120 túzetý engizildi. Bul normalar balanyń múddesin qorǵaý tetikterin kúsheıtip, memlekettik organdardyń jaýapkershiligin arttyrýdy kózdeıdi.
2025 jyly elimizdiń 13 óńiri men 73 eldi mekeninde balalardyń jaǵdaıyna monıtorıng júrgizildi. Onyń aıasynda 272 mekemede balalar arasynda jasyryn saýalnama alynyp, 173 otbasyda tárbıelenip jatqan jetkinshekterdiń turmys-tirshiligi zerdelendi. Tekserý nátıjesinde bala quqyqtaryn qorǵaý salasyndaǵy zań talaptaryn buzýdyń 171 deregi anyqtalǵan.
Dınara Zákıevanyń aıtýynsha, júrgizilgen monıtorıng óńirlerde balalardyń quqyqtaryn qorǵaý isinde basqarýshylyq deńgeıde júıeli úılestirýdiń qajet ekenin kórsetken.
— Balalarǵa qatysty máseleler kóbine jergilikti deńgeıde týyndaıdy. Sondyqtan óńirlerde derbes basqarma qurý balalardyń quqyqtaryn qorǵaý boıynsha jedel ári naqty sheshim qabyldaýǵa múmkindik beredi, — dedi ýákil.
Qazirgi tańda aımaqtarda turmystyq zorlyq-zombylyqtyń aldyn alý jáne otbasylarǵa qoldaý kórsetý maqsatynda ashylǵan 112 otbasylyq qoldaý ortalyǵy jumys istep tur. Alaıda saladaǵy ahýal bul jumysty ortalyqtandyrylǵan túrde basqarý qajettigin kórsetti.
Sonymen qatar erekshe qajettilikteri bar balalardy qoldaý baǵyty da keńeıtilip jatyr. Qazirgi ýaqytta «Qazaqstan halqyna» qory seriktesterimen birlesip 49 ońaltý ortalyǵyn iske qosty. Bul mekemelerde damýynda ereksheligi bar balalarǵa medısınalyq, áleýmettik jáne pedagogıkalyq qyzmetter kórsetiledi.
Aldaǵy kezeńde «Qazaqstan balalary» atty keshendi baǵdarlamany ázirleý, balalardyń onlaın qaýipsizdigin qamtamasyz etý, sondaı-aq kámeletke tolmaǵandardyń jeke derekterin qorǵaý máseleleri de basym baǵyttardyń biri bolmaq.
Jalpy, oblys ákimdikteri janynan bala quqyqtaryn qorǵaý jónindegi basqarma qurý bastamasy balalardyń quqyqtaryn qorǵaý júıesin óńirlik deńgeıde kúsheıtip, jaýapkershilikti naqty bólýge jáne aldyn alý sharalarynyń tıimdiligin arttyrýǵa baǵyttalǵan.