«Tesla» kompanııasy Berlınde adam tárizdi «Optimus» robotyn kópshilikke kórsetti. Tanystyrylym saýda ortalyǵynda ótip, qultemir qonaqtarmen amandasyp, popkorn taratqan.
«Tesla» málimetinshe, boıy 1,73 metr bolatyn «Optimus» qaýip týdyrmaıtyn qarapaıym jumysqa beıimdelgen. Ol tazalaý, tamaq ázirleý, qoımadaǵy sharýalar sııaqty mindetterdi atqara alady. Qazirdiń ózinde robot «Tesla»-nyń Kalıfornııadaǵy zaýytynda batareıalardy suryptap, elektromobıl qurastyrý jelisine kómek kórsetip júr. «Tesla» robotty shamamen bir jyldan keıin satylymǵa shyǵarýdy josparlap otyr. Baǵasy 20–25 myń dollar shamasynda bolmaq.