Búgin Májilistiń jalpy otyrysynda Ábýtálip Mútáli bıznesti qoldaý máselesine qatysty depýtattyq saýalyn Premer-mınıstrdiń orynbasary – Ulttyq ekonomıka mınıstri Serik Jumanǵarınge joldady, dep habarlaıdy Egemen.kz.
Depýtattyń aıtýynsha, Joǵary aýdıtorlyq palatanyń júrgizgen aýdıti myna bir mańyzdy júıelik máseleni anyq kórsetti: bıznesti qoldaýǵa arnalǵan memlekettik sharalardyń qomaqty bóligi naqty ekonomıkalyq nátıje bermeı otyr, soǵan qaramastan olar iske asyrylýyn jalǵastyryp jatyr.
«2019-2024 jyldar aralyǵynda kásipkerlikti qoldaýǵa shamamen 4,5 trln teńge bólingen. Alaıda kásipkerlerdiń 80 %-dan astamy bul qoldaýdyń naqty jaqsarý ákelgenin baıqamaǵan, 66 %-y qarjylyq emes qoldaý sharalary týraly múlde habarsyz bolǵan. Al ekonomıkanyń qurylymyndaǵy orta bıznestiń úlesi áli de 6-7 % deńgeıinde qalyp otyr.
Á.Mútáliiniń sózinshe, Ulttyq ekonomıka mınıstrligi men «Atameken» Ulttyq kásipkerler palatasy arasyndaǵy ózara jumys tıimsiz bolyp otyr. Sonyń saldarynan mıllıardtaǵan bıýdjet qarajaty kásipkerlerge naqty paıda ákelmeı, qaǵaz júzindegi eseppen ǵana shektelgen.
«2024 jylǵa arnalǵan «Isker aımaq» baǵdarlamasy boıynsha 93,5 mlrd teńge bólingenimen, onyń 60 %-dan astamy 5 iri qalaǵa baǵyttalyp, shaǵyn jáne shalǵaı aýdandar qoldaýsyz qaldy», dedi depýtat.
Ábýtálip Mútáliniń pikirinshe, qalyptasqan jaǵdaı júıedegi teńsizdikti aıqyn kórsetip otyr: negizgi qoldaý iri qalalarǵa baǵyttalyp, shaǵyn qalalar men eldi mekender is júzinde nazardan tys qalyp otyr. Qomaqty bıýdjet qarajaty bólingenine qaramastan, kásipkerler qoldaý sharalarynyń qoljetimdiligi men tıimdiligi tómen ekenin aıtyp otyr.
«Ulttyq ekonomıka mınıstrligi men «Atameken» nege mıllıardtaǵan qarjyny naqty nátıje bermeıtin formaldy baǵdarlamalarǵa jumsap otyr? Bul úshin kim jaýap beredi jáne memlekettik qoldaý eldiń barlyq óńirindegi kásipkerlerge shyn máninde jetýi úshin qandaı naqty sharalar qabyldanady?», degen suraqtarmen Á. Mútáli depýtattyq saýalyn aıaqtady.