AQTAÝ. 23 naýryz. Mańǵystaý oblysyna qyzylshaǵa qarsy ekpeden zardap shekken jasóspirimderdi qosymsha qaraý úshin Astanadan arnaıy tórt dáriger keldi. Bul týraly egemen.kz tilshisi habarlady.
Mańǵystaý oblystyq densaýlyq saqtaý basqarmasy basshysy R.Bektýbaevtyń aıtýynsha, Jańaózendegi 15 balanyń densaýlyǵyn respýblıkalyq ortalyqtardan kelgen 6 maman qadaǵalaýda. Astanadan kelgen 4 maman oblys ortalyǵyndaǵy aýrýhanada jatqan bes naýqasty qaramaq. Sondaı-aq, olar Jańaózen qalasyna baryp, ekpeden zardap shekken naýqastarmen jáne ata-analarmen jumys júrgizbek. Odan bólek, qıyn jaǵdaılarda balalardy jiberetin klınıkalardy anyqtamaq. Búginde Astana qalasyna jiberilgen 17 balanyń 8-i aýrýhanadan shyǵarylǵan.
Basqarma basshysy sońǵy kezderi ekpeden soń jıi-jıi talma ustap, aýrýhanada qınalyp jatqan qyz bala týraly beınerolıkke túsinik berdi. «Ǵalamtorda ony qyzdyń aǵasy túsirgendigi týraly aıtylǵan, biraq ony basqa áıel adam túsirgen. Qyzdyń ózi de, ata-anasy da bul beıne rolıktiń túsirilýine narazy», deıdi ol.
Gúlaıym Shyntemirqyzy.
Derek: egemen.kz.
Sýret: puzkarapuz.ru.