Sarbaz – áskerı forma kıgen, saptaǵy jaýynger. Al Ulttyq ulannyń sarbazy – munymen qosa asqaq armany, qaısar minezi bar, Otanǵa degen súıispenshiligin ispen kórsetýge tyrysatyn qabilet ıesi.
Qazir quqyqtyq tártip áskeriniń bólimshelerinde álem chempıony, akrobat, polıglot, dıktor, jalpy ónerpazdar qyzmet etedi. Olardyń jetistikteri zamanaýı armııa qarý-jaraqty ǵana emes, sonymen qatar aqyl-oıdy, mádenıet pen shyǵarmashylyqty biriktiretinin dáleldeıdi. Bıyl Ulttyq ulan osyndaı qurammen erekshelendi.
Ulttyq ulan sapyndaǵy talanttyń biri – gir sportynan úsh dúrkin Álem chempıony Erkebulan Keldibaev. Ony qarýlastary «HHI ǵasyr Qajymuqany» dep ataıdy. Alyp balýan Qajymuqan Muńaıtpasovty úlgi etken ol Almatydaǵy 5571 áskerı bóliminde Otan aldyndaǵy boryshyn ótep jatyr. Shymyrlyq pen qyraǵylyqty ushtastyrǵan Erkebulan megapolıstiń qaýipsizdigine úles qosyp keledi.
Al elordadaǵy quramda áskerı boryshyn ótep júrgen Batyrhan Saǵıdolla – jurtshylyqty mánerli de qońyr daýysymen súısindirgen sarbaz. Ol bas qalanyń qoǵamdyq tártibi men turǵyndardyń qaýipsizdigin baqylaıdy. Bos ýaqytynda Batyrhan dıksııasyn mashyqtap, óleń oqıdy, mátin jazady. Aty ańyzǵa aınalǵan dıktor Iýrıı Levıtan men Qazaq radıosynyń altyn daýysy Ánýarbek Baıjanbaevtyń muraǵattaǵy jazbalaryn tyńdaıdy. Onyń basty armany – Astanada ótetin Jeńis sherýin júrgizý. Jas sarbazdyń aıtýynsha, qazir ol bólim ishindegi saltanatty jıyndardy, áskerı sherýge daıyndyqtar men túrli is-sharany júrgizip daıyndalyp, mátin oqyp, jattap, daýysty durys qoıýǵa, ıntonasııamen oınaýǵa qatysty kýrstarda talantyn damytyp júr. «Tabıǵı daýysym bolsa da, ol úlken eńbekti talap etedi», deıdi ol. Qarýlas dostary Batyrhandy «bizdiń Levıtan» dep ataıdy. Qolbasshylyq ta Batyrhannyń bul umtylysyn qoldap otyr. Pavlodar qalasynan ásker qataryna shaqyrylǵan Batyrhan áskerdegi temirdeı tártipke baǵyna otyryp, jeke daǵdyny da mashyqtaýǵa bolatynyn aıtady.
6506 áskerı bólimi jeke quramynyń qataryn tolyqtyrǵan qos akrobat Arman Qaıyrbaev pen Ázızbek Qalmaǵanbetov te erekshe qurmetke laıyq. Kásibı mamandardyń dene shynyqtyrýy, tózimdiligi men jaýapkershiligi – qarýlastaryna úlgi. Olar sırk manejin áskerı plasqa, sahnalyq seriktestikti jaýyngerlik baýyrlastyqqa aınaldyrdy. Otan qorǵaýshy atanǵan burynǵy ártister búginde Shymkent kósheleriniń tynyshtyǵyn qyraǵylyqpen qorǵap júr.
Sondaı-aq Abaıdyń ondaǵan óleńin jatqa biletin jaýynger Juldyzbek Romashev «juldyzǵa» aınaldy. Abaı kúnin merekeleý qarsańynda ol taqyryptyq is-sharalar men poetıkalyq keshterge belsene qatysyp, Abaı shyǵarmashylyǵyn úzeńgilesterine pash etti. Onyń bul óneri Otanǵa qyzmet etý tártipten ǵana emes, rýhanı qundylyqtardan bastalatynyn kórsetedi.
О́nerli sarbazdar qatarynda polıglottar da bar. 5571 áskerı bóliminiń sarbazy Vladımır Kopylov bes túrli túrki tilin, sondaı-aq birneshe sırek dıalektini erkin meńgergen. Bul oǵan Almaty kóshelerinde qoǵamdyq tártipti qamtamasyz etý kezinde túrli ult ókilderimen ortaq til tabysýǵa kómektesedi. Vladımır qyzmetten bos ýaqytynda armııa ómirin óz bloginde nasıhattap, bólimsheniń oń ımıdjin qalyptastyrýǵa eleýli úles qosyp keledi.
Mundaı sarbazdar Ulttyq ulandy myqty, bilimdi, jan-jaqty tulǵalar qyzmet etetin talanttar ordasy dep ataýǵa laıyq ekenin kórsetedi.