Balqash qalasynyń áýejaıynda júrip jatqan aýqymdy rekonstrýksııa jumystary bıyl jyl sońyna deıin aıaqtalady dep josparlanǵan. Kelesi jyldan bastap áýe aılaǵy kún saıyn 8-9 ushaqty qabyldaýǵa daıyn bolady, dep habarlaıdy Egemen.kz.
Qaraǵandy oblysynyń ákimi Ermaǵanbet Bólekpaev «Saryarqa» telearnasyna bergen suhbatynda óńirdegi týrızmdi damytý josparlaryn bólisti. Ákimniń aıtýynsha, Balqash áýejaıyn jańartý jumystary aıaqtalýǵa jaqyn. 1967 jyly salynǵan jáne sońǵy ret 2007 jyly jóndelgen bul nysandy modernızasııalaýǵa Arnaýly memlekettik qordan 945 mln teńge bólingen.
«Qazir Balqash boıynsha óte aýqymdy jumystar atqarylyp jatyr. Bul tutas keshendi baǵdarlama. Áýejaıdy rekonstrýksııalaý jumystary aıaqtalýǵa jaqyn, kelesi jyldan bastap ol tolyq kúshinde jumys istep, kún saıyn 8-9 bortty qabyldaıdy. Sonymen qatar qala jaǵalaýyn abattandyryp, jaǵajaı aımaqtaryna ınfraqurylym tartyp jatyrmyz. Toranǵalyqqa buryn-sońdy bolmaǵan aýyz sý jetkizip, káriz júıesin ornatamyz», dedi aımaq basshysy.
Modernızasııa tolyq aıaqtalǵannan keıin Balqashtan Shymkent, Jezqazǵan jáne Túrkistan qalalaryna jańa baǵyttar ashylyp, ushý geografııasy keńeıtilmek. Bul sharalar demalýshylar aǵynyn aıtarlyqtaı arttyrýǵa tıis.
Sonymen qatar Balqash óńirin damytýdyń keshendi baǵdarlamasy aıasynda qala jaǵalaýyn abattandyrý, jaǵajaı aımaqtaryna ınjenerlik ınfraqurylym tartý jumystary júrip jatyr. Jańa demalys oryndaryn salý úshin barlyq kommýnıkasııasy bar jer telimderine aýksıondar ótkizilip jatyr.
Balqash kólinen 700 myń tekshe metr tunba shyǵarylady
Oblys basshysy Qarqaraly aýdanyndaǵy týrızmniń jaı-kúıine de toqtaldy. Ondaǵy 75 gektar aýmaqty alyp jatqan «Buǵyly» demalys aımaǵy jyl boıy jumys isteıtin bolady. Bıyl Qaraǵandy – Qarqaraly tasjoly tolyq jóndeýden ótse, keler jyly Qarqaraly qalasynyń ishki joldary jańartylmaq.