El Úkimeti Memleket basshysynyń tapsyrmalaryn júzege asyrý sheńberinde týrızm jáne sport salalary boıynsha 2025 jyldy qorytyndylady. Sonymen qatar sport salasynyń úzdik ókilderin marapattaýǵa arnalǵan «Úzdik – 2025» syılyǵyn tabystaý rásimi ótti, dep habarlaıdy Egemen.kz.
Týrızm jáne sport mınıstri Erbol Myrzabosynov bıyl Qazaqstanda týrıstik aǵynnyń ósýi baıqalǵanyn aıtty.
«2025 jyldyń qańtar-qyrkúıek aılarynyń qorytyndysy boıynsha elimizge týrıstik maqsatta 12,1 mln shetel azamaty kelgen. Olardyń 8,6 mıllıony elde bir táýlikten astam ýaqyt bolǵan sheteldik týrıster retinde jiktelgen. Ornalastyrý oryndarynyń qyzmetin 1 mln sheteldik jáne 6,7 mln ishki týrıst paıdalanǵan, bul syrttan kelgen týrızm men ishki týrızmniń turaqty ósimin kórsetedi», dedi mınıstr.
Vedomstvo derekterine sáıkes, elimizde bir mezgilde 243,5 myńnan astam jatyn orynǵa eseptelgen 4 499 ornalastyrý nysany jumys isteıdi. Qonaq úıler men ózge de ornalastyrý nysandarynyń jıyntyq tabysy 268 mlrd teńgege jetip, óńirlerdegi iskerlik belsendilik pen týrıstik tutynýdyń artqanyn kórsetti.
Qysqy týrızmniń qalaýly baǵyttary
2025 jyldyń qańtar-qazan aılarynda týrızm salasyna tartylǵan ınvestısııa kólemi 38,1%-ǵa ósip, 923 mlrd teńgeni qurady. Sonymen qatar eldiń 20 óńirinde 147 ınfraqurylymdyq joba júzege asyrylyp jatyr. Bul salaǵa jeke jáne ınstıtýsıonaldyq kapıtaldyń joǵary qyzyǵýshylyǵyn dáleldeıdi.