Astanadaǵy Farıza Ońǵarsynova atyndaǵy №77 mektep-gımnazııasy on jyldyq mereıtoıyn atap ótti. 10 jyl ishinde ózindik dástúri men jańashyl baǵytyn qalyptastyrǵan mekteptiń mereıtoıyna memleket jáne qoǵam qaıratkerleri, Prezıdent janyndaǵy Ulttyq quryltaı músheleri, astanalyq bilim basqarmasy men elordanyń orta bilim uıymdarynyń basshylary jáne zııaly qaýym ókilderi qatysty.
Merekelik baǵdarlama aıasynda qonaqtarǵa Farıza kabınetindegi «Neo 77» jasandy ıntellekt botynyń múmkindigi kórsetilip, jańadan jabdyqtalǵan ınformatıka kabıneti tanystyryldy.
Is-shara barysynda qonaqtar panoramalyq ashyq sabaqtarǵa qatysty. Atap aıtqanda, «Adal azamat – Otan tiregi!» taqyrybyndaǵy tárbıe saǵaty, aǵylshyn tili men ınformatıka pánderi boıynsha ashyq sabaqtar ótkizildi. Sabaqtarda oqýshylardyń azamattyq jaýapkershiligi, fýnksıonaldyq saýattylyǵy men zamanaýı daǵdylaryn qalyptastyrý máseleleri keńinen qamtyldy. Sonymen qatar mektep jetistikteri men oqýshylar shyǵarmashylyǵyn tanytqan kórme kópshilik nazaryna usynyldy.
Mereıtoıdyń shymyldyǵyn túrgen eń basty saltanatty sát – «Júrek sensiń, Otanym!» atty dóńgelek ústel formatyndaǵy mazmundy kezdesý boldy. Is-shara oqýshylar horynyń oryndaýyndaǵy mektep ánuranymen ashyldy. Jas daýystardaǵy shynaıy lep pen júrekten shyqqan ún zalǵa erekshe rýh berip, merekelik kóńil kúıdi asqaqtata tústi. Ánnen keıin kópshilik nazaryna on jyldyq tarıhty qamtyǵan beınefılm usynyldy. Kórermendi bir sátke ótkenge jetelegen bul týyndyda bilim ordasynyń qalyptasý kezeńderi, qol jetkizgen jetistikteri, shákirtter men ustazdar eńbeginiń nátıjesi, sondaı-aq aldaǵy damý baǵyttary júıeli ári jan-jaqty kórsetildi. Ekrannan syr shertken ár kadr bolashaqqa degen senimdi kúısheıte tústi. Bul bólim mereıtoıdyń mazmunyn tereńdetip, mekteptiń tek bilim beretin oryn emes, urpaq tárbıeleıtin úlken rýhanı orta ekenin taǵy bir márte aıqyndady.
Sonymen qatar dóńgelek ústelde Oqý-aǵartý mınıstrligi Tárbıe jumysy jáne qosymsha bilim berý departamentiniń dırektory Erlan Qalmaqov, Astana qalalyq Bilim basqarmasy basshysynyń orynbasary Asyl Amangeldiqyzy, №77 mektep-gımnazııasynyń alǵashqy dırektory, qazirgi tańda Temirbek Júrgenov atyndaǵy №70 mektep-lıseı dırektory Gúljamal Baımenova, Prezıdent janyndaǵy Ulttyq quryltaı múshesi, akademık Kárimbek Qurmanálıev, Prezıdent janyndaǵy Ulttyq quryltaı múshesi, akademık Dıhan Qamzabekuly, Qazaqstannyń eńbek sińirgen zańgeri Irak Qasymuly, farızatanýshy, fılologııa ǵylymynyń kandıdaty Gúlsim Eńsepova sóz sóılep, ulttyq qundylyqtardy ulyqtaý týrasynda oılaryn ortaǵa saldy.
Merekelik kesh poezııa men ónerge ulasyp, ustazdar óleń oqyp, ónerli oqýshylar bı bılep, án aıtty. Respýblıka deńgeıindegi baıqaýlarda top jarǵan jas talanttar kórermenderdiń ystyq yqylasyna bólendi.