Jumysshy mamandyqtary jyly qatardaǵy eńbek adamdarynyń mereıin ósirdi. Jastardyń tehnıkalyq mamandyqtarǵa, óndiris salasyna qyzyǵýshylyǵyn arttyra tústi. О́z isiniń sheberleri qarapaıym eńbek ete júrip te eldiń ystyq yqylasyna bólenip, alǵysyn arqalaýǵa bolatynyn jaqsy biledi.
Talǵar aýdany turǵyndaryn aýyzsýmen turaqty túrde qamtamasyz etýge, káriz júıesine jaýapty mekemede 265 adam eńbek etedi. Jumysshylar arasynda san jyl boıy taban aýdarmaı eńbek etip kele jatqan, osy salanyń maıtalman mamandary atanǵan Plýjnıkovter, Belovtar syndy áýlet, otbasylar da bar. Aǵaıyndylardyń aldy osy salada shırek ǵasyrǵa jýyq turaqty jumys istep keledi.
«Alatau Public Utilities» JShS Talǵar aýdandyq paıdalaný ýchaskesiniń bas ınjeneri Tursynbaı Bekbosynovtyń aıtýynsha, bıylǵy jartyjyldyqta sý qubyrynda 1417, káriz júıesinde 432 apattyq jaǵdaı oryn alyp, jóndeý jumysy atqarylǵan. Buǵan qosa turǵyndardan túrli shaqyrtý tynbaı túsip jatady.
«Aýdannyń Talǵar qalasynan bólek, Besaǵash, Panfılov, Dáýlet aýyldaryndaǵy kópqabatty úıler men áleýmettik nysandar káriz júıesine qosylǵan. Qubyrlar óte eski, apat jıi oryn alady. Ony qalypqa keltirý ońaı emes. Bul jumysqa jastar múlde jolamaıdy. Eki-úsh kúndik synaq merzimin aıaqtamaı, jaltaryp ketedi. Osy qıyn jumysty eńserýde joǵaryda atalǵan otbasy músheleriniń eńbegi eren», deıdi bas ınjener.
Áýlettiń otaǵasy Ivan Belov bul mekemede jastaıynan jumysqa ornalasqan. Búginde ýchaske basshysy bolyp abyroıly eńbek etip júr.
«Alǵashqy eńbek jolymdy «Almaty» ujymsharynda dánekerleýshi, traktor júrgizýshi bolyp bastap, úsh jarym jyl jumysqa tóseldim. Munda kelgen soń, ekskavatorǵa otyrdym. Odan keıin avtokólik júrgizdim. Bir sózben aıtqanda, mekemeniń barlyq tehnıkasyn tizgindedim, birer jyl slesar da boldym. Tájirıbe tolysa kele sheber, keıingi 20 jyldan astam ýaqyttan beri ýchaske basshysy retinde jaýapty jumystardy uıymdastyryp kelemin. Jastaıymnan kelgen mekeme ekinshi úıime aınaldy. Tóńiregime qolynan is keletin jumysshy mamandardy toptastyryp, ýaqyt óte kele olardyń jumysqa qyzyǵýshylyǵy oıandy. Kúndelikti tirshilikke aýadaı qajet aýyzsý men káriz júıesinde jumys isteýdegi sheberlikteri shyńdaldy. Búgingi kúni osy salada baýyrlarym Evgenıı men Nıkolaı da slesar bolyp eńbek etedi», deıdi ol.
«Áke kórgen oq jonar» demekshi, Evgenııdiń uly Dmıtrıı Anenko elektrgaz dánekerleýshi, Nıkolaıdyń uly Kırıll Mazeın dánekerleýshi, Ivan Belovtyń uly Vadım de slesarlyqty meńgerip, ákeleriniń jolyn jalǵastyryp keledi. Al Vladımır Plýjnıkov ýchaske basshysy, qyzy Olesıa operator bolyp eńbek etedi. Aýyzbirligi men tirshiligi úılesken aǵaıyndylardyń qol jetken tabystary tolaıym. Jyldyń qaı mezgilinde de óz mindetterin abyroıly atqaryp, kóptiń alǵysyna bólenip keledi.
Mekeme Talǵar qalasynan bólek, 33 eldi mekendi aýyzsýmen qamtamasyz etedi. Barlyǵyna aýyzsý jerasty sý kózderinen beriledi. Bul maqsatta sorǵylar iske qosylǵanymen, olardyń da tozyǵy jetken. Oǵan qosa sýqoımalarynyń syıymdylyǵy az bolǵandyqtan, halyqqa sý qajetti mólsherde jete bermeıdi. Shyǵyn kóp, kiris joq mekemedegi jumysshylardyń aılyǵy azdyǵyn aıtqan sala basshylary sonyń saldarynan jumysshy mamandyqtardyń tapshylyǵyn joıý múmkin bolmaı turǵandyǵyn tilge tıek etti.
«Talǵar qalasy taýdaǵy bulaq kózderinen jınalǵan sýlarmen qamtamasyz etiledi. Qys aılaryndaǵy qatty aıazdy kúnderi sýǵa muz qatady. Qubyrlardy bitep tastamasyn dep arnaýly brıgadalar kúni-túni kezekshilik etip, sý betindegi qabyrshyq muzdardy arnaıy súzgimen qalqyp, tazalap otyrady. Bul – óte aýyr jumys. Qatty aıazdy kúnderi jıi qaıtalanady. Sondaı qıyn sátterde jumysshylar jandaryn shúberekke túıe júrip, aıanbastan ter tógedi», deıdi «Alatau Public Utilities» JShS Talǵar aýdandyq paıdalaný ýchaskesiniń bastyǵy Qurmanǵalı Rametov.
Jalpy, jaz maýsymynda da mundaǵy mamandardyń jumysy jeńildemeıdi. Ashyq sý kózinen alynatyndyqtan, kún qatty qyzǵanda taýdaǵy muzdyqtar erip, sý laılanady. Talǵar qalasy turǵyndarynyń sýdan tarshylyq kórmeýi jolynda mamandar judyryqtaı jumyla eńbek etedi. Solardyń biri – Ashat Belekov. Onyń osy mekemede eńbek etkenine 25 jyldan asqan.
«Ashat – qyryq tesik bop jatatyn sýdy óz deńgeıinde ustap turýda biliktilik tanytyp otyrǵan eń myqty maman. Qaladaǵy qudyqtardyń qaısysy qandaı kúıde ekenin kózin jumyp aıtyp beredi. Búginde 50 myńnan astam turǵyny bar talǵarlyqtardyń aýyzsýdan taryqpaýyna tikeleı jaýapty. Ýaqytpen sanasýdy bilmeıdi. Taýdan bastap qaladaǵy búkil sý qubyrlaryn qadaǵalaıdy. Jyl on eki aı jumys basynan tabylady. Halyqtyń qamyn kúıttegen azamat ujymnyń maqtanyshy», dedi Qurmanǵalı Amanturdyuly.
Talǵar qalasyndaǵy aýylsharýashylyq kolledjin támamdaǵan Ashat – úlgili otbasynyń ıesi, úsh balanyń asqar taý ákesi.
«Sýmen jumys isteýdiń qıyndyǵy kóp, onyń qyr-syryn kónekóz mamandardan úırendim. Tájirıbe ýaqyt óte tolysady. Osy jyldar ishinde barlyq jumysty istep kórdim. Ýchaske basshysy retindegi búgingi mindetim – jumys bastalmas buryn tehnıkalyq qaýipsizdikti túsindirip, brıgada quramyna tapsyrma berý, atqarylǵan jumystyń sapasyn qadaǵalaý. Degenmen buıryq berip qarap turý ádetimde joq. Jigitter jumyla jumys isteımiz. О́ıtkeni mamandar jetispeıdi. Qara jumystan qashady jastar. Jumysshy mamandyqtary jylyna oraı eńbekaqy ósip, jumysshylardyń mártebesi kóterilse, bálkim keleshekte kóbeıe jatar degen úmit te joq emes», deıdi óz isiniń bilgiri.
Almaty oblysy