Qalıbek Qýanyshbaev atyndaǵy Qazaq ulttyq mýzykalyq drama teatry jyl sońyn erekshe premeramen túıindeıdi. 28-29 jeltoqsan kúnderi «Anna Karenına. Roman paraqtary» horeodramasy kórermenin qýantady. Bul qoıylym – mahabbat úshin kúresken jannyń taǵdyry, baqytty izdegen júrektiń tragedııasy, dep habarlaıdy Egemen.kz.
Spektakl álem ádebıetiniń jaýhary Lev Tolstoıdyń «Anna Karenına» romanynyń negizinde qoıylady. Sahnalyq nusqasynyń avtory ári qoıýshy rejısseri – Racha Mahataev, qazaq tiline aýdarǵan – Qymbat Elýbaeva.
Qoıylymda avtordyń adam bolmysy, moraldyq tańdaý, qoǵam men jeke tulǵa arasyndaǵy qaıshylyqtar týraly tereń fılosofııalyq oılary zamanaýı sahnalyq tilde usynylady. Spektakl adamnyń ishki jan álemindegi qaqtyǵystardy, sezim men jaýapkershilik arasyndaǵy kúrdeli tańdaýdy kórsetedi.
Spektakldiń janry – horeodrama. Bul janr dramalyq áreketti qımyl-qozǵalys, plastıka jáne mýzykalyq sheshimder arqyly jetkizýge múmkindik beredi. Qoıylymda sóz ben qozǵalys birtutas kórkemdik júıe qurap, keıipkerlerdiń ishki psıhologııalyq kúıin jetkizedi.
Sahnalyq keńistiktiń kórkem sheshimin jasaǵan – qoıýshy sýretshi Qanat Maqsutov. Qoıylymnyń horeografııalyq tilin qalyptastyrǵan – Anastasııa Chıstıýhına. Al keıipkerlerdiń minezin, dáýirdiń rýhyn ashatyn kostıýmder kıim sýretshisi Shynar Elembaevanyń qoltańbasyn tanytady.
Basty rólder eki quramda oryndalady. Sahnada Inabat Ábenova, Qazaqstan Jastar Odaǵynyń «Serper» syılyǵynyń laýreaty Janat Ospanov, Qazaqstannyń eńbek sińirgen qaıratkeri Aınur Bermuhambetova, Qaıyrjan Sadyqov, «Daryn» memlekettik jastar syılyǵynyń laýreaty Aqmaral Tanabaeva, Erǵulan Janpeıisov, Birjan Júnisov bastaǵan teatrdyń talantty ártisteri kórermenmen syrlasady.