Nıý-Djersı shtatynyń ońtústiginde eki tikushaq soqtyǵysyp qaldy. Oqıǵa saldarynan bir adam qaza tapty, bireýi jaraqat aldy, dep habarlaıdy Egemen.kz CNN-ge silteme jasap.
Oqıǵa shamamen tańǵy 11:25-te Hammonton mýnısıpaldyq áýejaıynyń mańynda bolǵan. Áýede Enstrom F-28A jáne Enstrom 280C úlgisindegi tikushaqtar soqtyǵysqan. Eki tikushaqtyń bortynda tek ushqyshtar bolǵan.
Zardap shekkender aýyr jaraqattarmen travmatologııalyq ortalyqqa jetkizildi.
Áýejaıdaǵy meıramhananyń ıesi Sal Sılıpınonyń aıtýynsha, eki ushqysh ta onyń turaqty tutynýshylary bolǵan jáne ushar aldynda birneshe mınýt buryn ǵana tańǵy as ishken.
AQSh-tyń Ulttyq kólik qaýipsizdigi keńesi apatqa baılanysty tergeýdi bastady. Keńes ókilderi ushý traektorııasy men áýe kemeleriniń tehnıkalyq jaǵdaıy týraly derekter jınaý úshin tergeýshini oqıǵa ornyna jibergen.
«Synyqtar qujattalǵannan keıin eki tikushaq ta ári qaraı zertteý júrgizý úshin kúzetiletin orynǵa kóshiriledi», dep málimdedi Ulttyq kólik qaýipsizdigi keńesi.
Hammonton qalasynyń órt sóndirý qyzmeti kýágerlerdi jedel qyzmetterdiń jumysy aıaqtalǵanǵa deıin oqıǵa ornyna jaqyndamaýǵa shaqyrdy.