Eger oqyrmannyń esinde bolsa, osy qarasha aıynda Almaty qalalyq kardıologııalyq ortalyǵy óz tarıhynda alǵash ret 34 jastaǵy pasıentke júrek transplantasııasy operasııasyn jasaǵan edi. Qazir aýrýhanadan shyqqan pasıenttiń jaǵdaıy birqalypty. Bul týraly búgin Almaty qalasy Qoǵamdyq densaýlyq saqtaý basqarmasynyń ókilderi habarlap otyr, dep jazady Egemen.kz.
Bilikti mamandarǵa tap bolǵan naýqas – sozylmaly júrek jetkiliksizdiginiń sońǵy satysyna shaldyqqan 34 jastaǵy azamat bolatyn. Ol buǵan deıin júrek aýystyrý otasyn kútip, respýblıkalyq kezekte turǵan.
Bes saǵattan astam ýaqytqa sozylsa da sátti aıaqtalǵan júrek aýystyrý otasyn Almaty qalalyq kardıologııalyq ortalyǵynyń bilikti mamandarynan quralǵan mýltıdıssıplınarlyq komanda Astanadaǵy University Medical Center dárigerlerimen birlesip jasaǵan edi. Oǵan Qalalyq kardıologııalyq ortalyqtyń dırektory Ermaǵambet Qýatbaev pen UMC korporatıvtik qory basqarma tóraǵasy, professor Iýrıı Pıa jetekshilik etti. Qajetti qoldaý kórsetý úshin UMC mamandary Almatyǵa jedel túrde keldi.
Qazirgi tańda qalalyq kardıologııalyq ortalyǵynda joǵary tehnologııalyq otalar jasaý úshin barlyq qajetti jaǵdaı jasalǵan. Munda bilikti kardıologtar, kardıohırýrgter, anestezıolog-reanımatologtar, perfýzıologtar men operasııalyq meıirbıkeler qyzmet atqarady. Zamanaýı dıagnostıkalyq jáne emdeý ádisteri engizilip, halyqaralyq standarttarǵa saı jabdyqtar qoldanylady.
Qazir saýyǵyp úlgergen naýqas dárigerler men medısına qyzmetkerlerine shynaıy rızashylyq bildirdi.
«Aýrýymnyń bári energetık sýsyndardan bastaldy. Basynda kúnine bir bótelkemen shektelsem, keıin kún saıyn 8-10 energetıkalyq sýsynǵa deıin jettim. Munyń sońy aýyr dıagnozǵa ákeletinin ańǵarmappyn. Búgin men dárigerlerdiń jankeshti eńbeginiń arqasynda tirimin. Endi densaýlyqtyń adam ómirindegi eń úlken baılyq ekenin anyq túsindim», dedi naýqas.
Aýrýhanadan shyqqannan keıin naýqas ózi tirkelgen emhanada dárigerlerdiń turaqty baqylaýynda bolady. Júrek transplantasııasymen birge, stasıonarlyq em, qajetti dári-dármekpen qamtamasyz etý, ońaltý men odan keıingi medısınalyq baqylaý memlekettik kepildik berilgen tegin medısınalyq kómek aıasynda memleket esebinen kórsetiledi.
Eske sala keteıik, arterııalyq gıpertenzııanyń aýyr túrimen aýyrǵan, ınsýlt alǵan 50 jastaǵy áıel donor boldy. Almaty qalalyq ortalyq klınıkalyq aýrýhanasyna shuǵyl túrde jetkizilgennen keıin dárigerler konsılıýmy onyń mı ólimin anyqtap, máıittik donorǵa ruqsat berdi. Marqumnyń týystary kelisimin bergen soń donorlyq úderis uıymdastyrylǵan bolatyn.