Sańyraýlyq dıagnozynyń asqynǵan túrine shaldyqqan 13 jastaǵy bala «Jap-jaryq álemniń únin estımin be?» degen bir úmit, bir úreıdiń jeteginde operasııa jasatty. Mundaı operasııa túri Qaraǵandyda alǵash ret oryndalyp, óńir medısına salasynda tarıhı oqıǵa tirkeldi.
О́ńirde alǵash ret aýyr dárejedegi sańyraýlyq dıagnozy qoıylǵan balaǵa kohlearlyq ımplantasııa operasııasy sátti jasaldy. Bul – aımaqta joǵary tehnologııaly medısınalyq kómektiń jańa kezeńge kóterilgenin kórsetetin kósheli jetistik. Joǵary dáldikti talap etetin kúrdeli hırýrgııalyq operasııa Qaraǵandy qalasyndaǵy Kópbeıindi oblystyq balalar aýrýhanasynda ótti. Kohlearlyq ımplantasııa – estý apparattary kómektespeıtin balalarǵa dybysty, sóıleýdi, qorshaǵan ortany estýge múmkindik beretin zamanaýı medısınalyq ádis. Balalar otorınolarıngologııasynda mundaı operasııalar asa kúrdeli ári jaýapty sanalady.
Buǵan deıin kohlearlyq ımplantasııa tek Astana men Almaty qalalarynda ǵana jasalyp kelgen. Qaraǵandy oblysynda alǵash ret atalǵan operasııanyń sátti ótýi – óńir medısınasynyń áleýeti artqanyn, salalyq mamandardyń kásibı deńgeıi jańa beleske kóterilgeniniń dáleli.
Operasııany óńirde oryndaýǵa júıeli daıyndyq jumystary aldyn ala júrgizildi. Qaraǵandy oblysy ákimdiginiń qoldaýymen zamanaýı medısınalyq qural-jabdyqtarmen qamtylǵan iri balalar aýrýhanasy salyndy. Sonymen qosa, LOR-bólimshesiniń meńgerýshisi, emdeýshi dáriger, sýrdopedagog Reseıdiń Sankt-Peterbýrg, Máskeý qalalarynda arnaıy taǵylymdamadan ótip, Izraıldiń Haıfa qalasynda kohlearlyq ımplantasııa júrgizý jóninde kásibı biliktiligin arttyrdy. Bul qadam óńirde joǵary tehnologııaly medısınalyq kómekti tolyq kólemde kórsetýge jol ashyp otyr.
– 2024 jyly kohlearlyq ımplant ornatýǵa arnalǵan arnaıy apparattar satyp alyndy. Jyl sońyna qaraı operasııalyq mıkroskop jetkizilip, tolyqqandy tehnıkalyq baza qalyptasty. Operasııa jasalǵan balany uzaq merzimdi ońaltý kezeńi kútip tur. Operasııadan keıin sýrdolog pen logopedtiń qatysýymen júıeli ońaltý jumystary júrgizilip, ımplanttyń qyzmeti kezeń-kezeńimen baqylaýda bolady. Bul balanyń bolashaqta dybysty estip, sóıleýdi meńgerýine, qatarlastarymen erkin aralasyp, jalpy bilim beretin mektepte oqýyna múmkindik beredi, – dedi kópbeıindi oblystyq balalar aýrýhanasynyń dırektory Arǵyn Bıdaıbaev.
Mamandardyń aıtýynsha, alǵashqy operasııa postlıngvaldy sańyraýlyq dıagnozy qoıylǵan 13 jastaǵy balaǵa jasalǵan. Operasııa sátti ótti, naýqastyń qazirgi jaǵdaıy qalypty.
Astana qalasynyń shtattan tys bas balalar otorınolarıngologi, operasııalyq bólimsheniń meńgerýshisi Arman Amangeldiulynyń aıtýynsha, bul – óńir balalaryna medısınalyq qyzmettiń qoljetimdiligin arttyratyn mańyzdy qadam.
– Kohlearlyq ımplantasııa joǵary tehnologııaly medısınalyq qyzmetter qataryna jatady. Mundaı operasııanyń óńirde alǵash ret jasalýy balalardy basqa qalalarǵa jiberý qajettiligin azaıtady. Eger bul baǵyttaǵy jumys júıeli túrde jalǵassa, operasııa sany artyp, qyzmet óńirdiń muqtaj balalaryna tolyq qoljetimdi bolady, – deıdi ol.
Jón, jaqyn ýaqytta oblysta taǵy 10 balaǵa kohlearlyq ımplantasııa jasaý josparlanyp otyr. Bul da bolsa óńirde balalarǵa kórsetiletin joǵary tehnologııaly medısınalyq kómektiń turaqty túrde damyp kele jatqanynyń taǵy bir aıǵaǵy. Kohlearlyq ımplantasııa – tek medısınalyq operasııa ǵana emes, balanyń ómir súrý sapasyn túbegeıli ózgertetin múmkindik. Kenshiler qalasynda bastalǵan bul tájirıbe óńir medısınasynyń áleýetin arttyryp qana qoımaı, júzdegen otbasyna úmit syılaıtyn ıgi bastama retinde de baǵaly bolyp otyr.
Qaraǵandy oblysy