Elimizde mánerlep syrǵanaýmen turaqty jattyǵatyndar sany jyl saıyn artyp, búginde 2 700 adamǵa jaqyndady. Bul týraly Úkimet otyrysynda Qazaqstandyq mánerlep syrǵanaý odaǵynyń vıse-prezıdenti Talǵat Burhan aıtty, dep habarlaıdy Egemen.kz.
Ol mánerlep syrǵanaý sporty elimizdiń 16 óńirinde keshendi damyp kele jatqanyn atap ótti.
Jasóspirimder sport mektepterindegi balalar sany 1 myńnan asady, jattyqtyrýshylar sany da 70-ten asty.
El aýmaǵynda mánerlep syrǵanaýmen aınalysýǵa arnalǵan 26 muz arenasy jumys isteıdi.
Atalǵan arenalardyń 5-eýi halyqaralyq standarttarǵa sáıkes keledi, atap aıtqanda: «Almaty Arena», «Halyq Arena», «Barys Arena», «Qaraǵandy Arena» jáne Almaty qalasyndaǵy Balýan Sholaq atyndaǵy Sport saraıy.
«Mánerlep syrǵanaý sportynyń Halyqaralyq arenadaǵy sportshylarymyz jaıly aıtqanda esimizge birinshi rette Denıs Ten, Elızabet Tursynbaeva, Mıhaıl Shaıdorovtardyń esimderi túsedi. Bulardan bólek te ártúrli jyldarda el namysyn Azııa jáne álemdik arenalarda abyroımen qorǵaǵan sportshylarymyz az emes. Áıtse de, árbir sporttyń asqar shyńy – Olımpıada oıyndary.
Tórt jylda bir keletin tórtkúl dúnıeniń sport dodasyna Táýelsiz Qazaqstan retinde el sportshylary bes ret qatysty. 2014 jyly Sochı Olımpıadasynda Denıs Ten qolaǵa qol jetkizip, tarıh jasady», dedi Talǵat Burhan.
2026 jyly Italııada ótetin qysqy Olımpıadada mánerlep syrǵanaýdan el namysyn eki sportshymyz – Mıhaıl Shaıdorov pen Sofıa Samodelkına qorǵaıtyny atap ótildi.