Tehnologııany tegin meńgeredi

Elordada ashylatyn bul ortalyqtyń ereksheligi – jasóspirimge «tehnologııany tutyný» deńgeıinen «tehnologııany jasaý» deńgeıine ótýge jol ashýyn­da. Búginde balalardyń kóbi telefon men áleýmettik jelini erkin meńgergenimen, onyń ar jaǵyndaǵy algorıtm, jasandy ıntellekt qalaı jumys istep turǵanyn, oıyn nege dál solaı qurastyrylǵanyn, beıne men dybystyń qalaı óńdeletinin bile bermeıdi.

Qazir qalanyń ózinde sapaly IT-kýrstardyń baǵasy ár otbasyǵa birdeı qol­jetimdi emes. Al testileýi bar baǵdar­la­malarda keı oqýshy «irik­teýden ótpeı qalarmyn» dep taı­saqtaıdy. «TUMO Astana» emtıhansyz qabyldaý arqyly jasóspirimniń yntasyn birinshi orynǵa qoıady, ıaǵnı qyzyǵýshylyq bolsa – esik ashyq.

Onyń ústine «TUMO» formaty mekteptegi dástúrli «tyńda da jatta» úlgisin qaıtalamaıdy. Munda ár bala óz qarqynymen il­gerilep, naqty jobalar jasap, ná­tıjesin sıfrlyq portfolıoǵa aınaldyrady. Biri alǵashqy saıtyn qurastyryp shyǵýy múmkin, «endi biri robot qurastyryp, ony qozǵaltýdy úırenedi, al úshinshisi generatıvti jasandy ıntellekt kómegimen ıllıýstrasııa jasap, moýshn-grafıkaǵa deıin barady. Mundaı tájirıbe jasóspirimge «men isteı alamyn» degen senim beredi ári ýaqyt óte kele jaı qyzyǵýshylyq kásibı daǵdyǵa, tipti bolashaq mamandyqqa ulasýy bek múmkin.

«TUMO Astana» «alem.ai» halyq­aralyq jasandy ıntellekt orta­lyǵynda ornalasyp, álemniń ondaǵan elinde jumys istep turǵan «TUMO» jahandyq jelisiniń bir bóligine aınalmaq.

Bul ortalyqta jas­óspirim­der 11 baǵyt bo­ıynsha tegin bilim alady. Olardyń qata­rynda generatıvti jasandy ıntellekt, robot­tehnıka, baǵdarlamalaý, gra­fıkalyq dızaın, anımasııa, kıno­óndiris, sıfrlyq mýzyka, 3D-mo­deldeý, veb-ázirleý, oıyn jasaý jáne moýshn-grafıka bar. Oqytý oflaın formatta, tájirıbege súıenip uıymdastyrylady. Qatysýshylar naqty jobalarmen jumys isteıdi, oqý qarqynyn ózdiginshe aıqyndap, tálimgerlerdiń qol­daýyna ıe bolady.

Bul modeldiń tıimdiligin «Dalberg» kon­saltıngtik kompanııasynyń halyqaralyq zert­teýi de dáleldegen. Tehnıkalyq daǵdy­lar­men qatar, «TUMO» komandalyq jumys, bastamashyldyq, empatııa, kommýnıkasııa jáne ýaqytty basqarý sııaqty ámbebap quzyretterdi damytady. Bilim berý jeke oqý traektorııasyna negizdelgen «TUMO Path» júıesi arqyly júzege asady, sondaı-aq ár elden kelgen sarapshylar qatysatyn praktıkalyq vorkshoptar men zerthanalardy qamtıdy.

Jobany «Alem.ai Foundation» qory iske asyrady. Atalǵan qor eli-mizde tehnologııa­ny ıgergen krea­tıvti talanttardyń jańa býynyn qalyptastyrýdy kózdeıdi.

«Biz elorda jasóspirimderine irikteý men emtıhansyz óz daǵdylaryn shyńdaýǵa bolatyn alań usynǵymyz keledi. Ol úshin tehnologııaǵa degen súıispenshilik pen qyzyǵýshylyq bolsa jetkilikti. «TUMO» tájirıbe jasaýǵa, qatelesýge, jańa dúnıe­lerdi jasaýǵa jáne dara joldy tabýǵa múmkindik beredi», dedi «Alem.ai Foundation» qorynyń bas dırektory Adına Maratqyzy.

Aıta keteıik, «Alem.ai Foundation» – elimizde jasandy ıntellekt pen aqparat­tyq tehnologııalar sala­syndaǵy ınnova­sııa­lyq bilim berý bastamalaryn damyta­tyn kom­mer­sııalyq emes korporatıvtik qor. Qordyń negizgi jobalarynyń qata­rynda «Tomorrow School» jasandy ıntel­lekt mektebi men «TUMO Astana» bar. Qor sıfrlyq ekonomıkadaǵy jańa býyn JI-kóshbasshylaryna qoldaý kórsetip, olardyń daǵdylaryn damytýdy maqsat etedi.

«TUMO Astana»-ǵa qabyldaý ashyq formatta júrgiziledi. Munda emtıhan, testileý nemese basqa da baıqaý joq. Baǵdarlama tehnologııamen endi tanysyp júrgen jasóspirimderge de, óz daǵdylaryn júıeli túrde damytyp, jeke sıfrlyq portfolıo qalyptastyrýdy kózdeıtin qatysýshylar úshin de qyzyqty bolatyny sózsiz. Túıindep aıtsaq, «TUMO Astana» – jaı ǵana úıirme nemese qysqa kýrs emes, jasóspirimniń qabiletin erte tanyp, ony naqty ónimge aınaldyrýǵa múmkindik beretin orta. Munda alǵan bilim balanyń erteńgi kásibı tańdaýyn aıqyndap qana qoımaı, elimizdiń kreatıvti ındýstrııasy men sıfrlyq ekonomıkasyna jańa tynys ákeletin kadrlyq áleýetti kúsheıtpek. Bastysy – bul bastama jas býynǵa «tehnologııa sen úshin jabyq álem emes, ony meńgerýge de, jasaýǵa da bolady» degen senim uıalatady.