EQYU Parlamenttik Assambleıasynyń Venadaǵy Qysqy sessııasy aıasynda Qazaqstan delegasııasynyń basshysy Ikram Adyrbekov EQYU Parlamenttik Assambleıasynyń Prezıdenti Ilkka Kanervamen kezdesti, dep habarlady Qazaqstan Respýblıkasy Parlamenti Senatynyń baspasóz qyzmeti.
Kezdesý barysynda Qazaqstan men Parlamenttik Assambleıa arasyndaǵy ózara is-qımyldyń ózekti máseleleri talqylandy, sondaı-aq, osy sessııanyń kún tártibindegi keıbir taqyryptar boıynsha pikir almasyldy.
Taraptar EQYU-nyń aýqymdy qyzmet keńistiginde qaýipsizdikti qamtamasyz etýdegi EQYU-nyń rólin kúsheıtý jónindegi parlamentshiler arasyndaǵy syndarly únqatysýdy jalǵastyrý qajettigin atap ótti.
Sol kúni senator I.Adyrbekov Az ulttar isteri jónindegi Joǵarǵy komıssar (AUIJK) Astrıd Torspen de kezdesti. A.Tors Qazaqstannyń ultaralyq qatynastar salasyndaǵy belsendi memlekettik saıasatyn joǵary baǵalady jáne Qazaqstan halqy Assambleıasynyń 20 jyldyǵy atalyp ótetin bıylǵy jyldyń bizdiń elimiz úshin asa mańyzdy ekenin atap ótti.
A.Tors senatordy keńseniń alýan qaýymdastyqtardy yqpaldastyrý jónindegi baǵdarlamasyn iske asyrý barysy týraly habardar etti. Jetkinshek urpaqty mýltılıngvıstıkalyq turǵyda tárbıeleýde memlekettiń mańyzdy róli týraly da aıtyldy.
Qazaqstan delegasııasynyń basshysy AUIJK qyzmetine, onyń ishinde Qazaqstandaǵy keńsesi júzege asyrǵan baǵdarlamalaryna joǵary baǵa berdi. Ol eldegi qoǵam turaqtylyǵyn qoldaýdaǵy Qazaqstan halqy Assambleıasynyń mańyzdy róline toqtaldy. Sondaı-aq, az ulttardy qoldaý jónindegi saıasatty nyǵaıtýda parlamentaralyq dıplomatııany damytýǵa belsendi qatysýǵa ázirligin bildirdi.
Qazaqstandyq delegasııanyń basshysy I.Adyrbekov Atom energııasy jónindegi halyqaralyq agenttikte (AEHA) kezdesý ótkizdi. Kezdesýge AEHA tarapynan Úılestirý jónindegi bas dırektor keńsesiniń basshysy K.Ferýto, zań keńsesiniń basshysy P.Djonson, jobanyń atqarýshy dırektory T.Výd qatysty.
Júzdesý barysynda ekijaqty yntymaqtastyqtyń aýqymdy máseleleri talqylandy. Agenttik basshylyǵy beıbit atom energııasyn damytý boıynsha Qazaqstan AEHA-nyń mańyzdy áriptesi ekenin atap ótti. Iаdrolyq qarýsyzdaný men ony taratpaýdyń jahandyq úderisterine, onyń ishinde Semeı ıadrolyq polıgonyn jabýǵa, Ortalyq Azııada ıadrolyq qarýdan azat aımaq qurýǵa, Iаdrolyq synaqtarǵa qarsy halyqaralyq is-qımyldyń kúnin jarııalaýda jáne basqa da sharalarǵa Qazaqstannyń úlesin AEHA jaqsy biledi. AEHA úshin basymdyqqa ıe jáne erekshe máni bar tómen deńgeıde baıytylǵan ýran bankin jasaý jónindegi jobany iske asyrý barysy týraly Qazaqstan Parlamentiniń depýtattary habardar etildi