Asa daryndy qazaq shahmatshysy Bıbisara Asaýbaeva Qatardyń bas shahary Dohada rapıd pen blısten ótip jatqan álem chempıonatynda taǵy bir belesti baǵyndyrdy.
Blıstiń Bıbisaranyń oń jambasyna keletinin talaı baıraqty básekeler barysynda baıqaǵanbyz. Búǵan deıin ol shahmattyń dál osy túrinen 2021, 2022 jyldary álem chempıony atanǵan edi. Sonymen qatar jerlesimiz osyndaı deńgeıge jetken eń jas oıynshy retinde óz esimin tarıhta qaldyrdy. Rapıdten atalǵan jarystyń kúmisi men Azııanyń altynyn moınynda jarqyratqany taǵy bar. Klassıkalyq shahmattan da nátıjeleri óte jaqsy. Búginde Asaýbaevanyń FIDE reıtınginde úzdik ondyqty túıindep turǵany joǵaryda aıtylǵan sózimizdiń aıqyn dáleli.
Dohadaǵy dodanyń blıs saıysynda jer jahannyń ár qıyrynan jınalǵan 141 oıynshy baq synady. Olar shveısarııalyq júıemen 15 týr oınady. Bastapqy básekelerde 11 upaı jıǵan Asaýbaeva jartylaı fınalǵa joldama aldy. Bul mejede qazaq qyzy álem chempıonatynyń qola júldegeri, qytaılyq Chjý Szınerdi 3:0 esebimen oısyrata utty. Al fınaldyq básekede eki dúrkin álem chempıony, ýkraınalyq Anna Mýzychýktan basym tústi. Esep – 2,5:1,5. Sóıtip, Bıbisara Asaýbaeva úsh dúrkin álem chempıony atandy.