«Astana Hub» – keıingi jyldary elimizdegi talaı ıdeıaǵa «qanat» bitirip, startap degen uǵymdy jurtshylyqqa jaqyndatqan orta. Jas kásipker, ınvestor, tálimger jáne IT mamandarynyń basyn qosyp, tehnologııany jaı áńgime emes, naqty ónimge aınaldyratyn osy alań endi 2026 jyly da qarqynyn báseńdetpek emes.
Bıyl «Astana Hub» tehnologııalyq kásipkerlikti damytýǵa baǵyttalǵan júıeli jumysyn jalǵastyrmaq. Basty basymdyq startap-ekojúıeni aýqymdap, jahandyq naryqtarǵa baǵyttalǵan, halyqaralyq deńgeıde básekege qabiletti kompanııalardyń qalyptasýyna qolaıly jaǵdaı jasaýǵa beriledi. «Astana Hub»-qa qatysýshy kompanııalardyń tabysy, ásirese eksporttan túsetin kirisi, aldaǵy ýaqytta da turaqty ósedi degen boljam bar. Sonymen qatar shetel naryǵynda jumys isteıtin, jasandy ıntellektige negizdelgen startaptardyń sanyn kóbeıtý josparlanyp otyr.
«Astana Hub Silkway Accelerator», «AI’preneurs», «Startup Garage», «AlchemistX», «Hero Training», «Silicon Valley Residency Program» jáne basqa da baǵdarlamalardy iske asyrýdy ári qaraı damytady. Bul jobalar startaptardy ıdeıa kezinen bastap jetildirip, óndiriske daıyndaıdy.
Ekojúıede bolashaǵy zor komandalarǵa ınvestısııa quıatyn «Astana Hub Ventures» qory mańyzdy ról atqarady. Qazirgi tańda qor «Grand Mobile», «ZYPL AI», «Uniblock», «Surfaice», «Axellero», «Rette» (Defect AI) jáne «Clarity» startaptaryna ınvestısııa quıdy. Taǵy eki mámile qol qoıý satysynda. 2026 jyly «GP/LP» formatynda ekinshi qordy iske qosý josparlanyp otyr. Qazirgi ýaqytta jeke ınvestorlardyń qarajatyn tartý úshin lısenzııa alý úderisi júrip jatyr. Qordyń josparly kólemi keminde 20 mln dollar quramaq. Bul qoldaý startaptardyń ósýine jáne olardyń álemdik naryqtarda aýqymdanýyna baǵyttalǵan.
IT-ekojúıeni damytý – Úkimet pen Jasandy ıntellekt jáne sıfrlyq damý mınıstrliginiń birlesken jumysynyń bir bóligi. Memleket basshysy tarapynan IT salasyna kórsetilip otyrǵan basym qoldaý, «Alem Ventures Fund» qorlar qorynyń iske qosylýy, Kremnıı alqabynda, Shanhaıda jáne Dýbaıda halyqaralyq ınnovasııalyq habtardyń damýy, sondaı-aq sýperkompıýterlik ınfraqurylymnyń qurylýy venchýrlyq naryqtyń ósýine jáne ınvestısııalardyń ortasha kóleminiń ulǵaıýyna berik negiz qalaıdy. Munyń bári startaptarǵa iri ınvestısııa tartýǵa jol ashyp, bolashaqta baǵalanýy mıllıard dollarǵa jetetin, ıaǵnı unicorn deńgeıine kóterile alatyn kompanııalardyń kóbeıýine múmkindik beredi.
«Astana Hub» strategııasyndaǵy asa mańyzdy baǵyt – adam kapıtalyn damytý jáne tehnologııalyq talanttar qaýymdastyǵyn qalyptastyrý. «Tomorrow School», TUMO jáne ózge de bilim berý bastamalary arqyly «Astana Hub» jańa býyn kóshbasshylaryn daıarlaýǵa baǵyttalǵan júıeli jumysty jalǵastyra bermek.
Bul baǵytta «Alem.ai» halyqaralyq jasandy ıntellekt ortalyǵy erekshe ról atqaryp, elimizdiń JI salasyndaǵy áleýetin naqty kórsetip otyr. Ortalyq bilim berý, akselerasııa jáne zertteý baǵdarlamalary arqyly mektep oqýshylaryn, stýdentterdi, startaptardy, «BigTech» kompanııalaryn jáne memlekettik sektordy bir alańǵa jınaıdy. Negizgi maqsaty elimizdi jasandy ıntellektige súıengen memleketke aınaldyrý. «Alem.ai»-dy damytý aıasynda jyl saıyn shamamen 10 000 talantty tartý, jasandy ıntellekt salasynda keminde 1000 maman daıarlaý, 100-ge jýyq JI-startapty iske qosý jáne ǵylymı zertteýler júrgizý josparlanyp otyr.
Aıta keterligi, bul qazir jarııalanǵan aldyn ala josparlar ǵana. 2026 jyly «Astana Hub» startaptardy qoldaýǵa, ınvestısııa tartýǵa jáne IT salasyndaǵy talanttardy daıarlaýǵa baǵyttalǵan ózge de mańyzdy baǵdarlamalaryn jalǵastyra bermek.