Qazaqstanda balalardyń demalysy men saýyqtyrý ortalyqtarynyń jumysy jańa júıege kóshedi. Prezıdent Qasym-Jomart Toqaev qol qoıǵan jańa zań aıasynda 2026 jyldan bastap bul salanyń qyzmetine qatysty talaptar aıtarlyqtaı jańartyldy, dep habarlaıdy Egemen.kz.
Memleket basshysy Qasym-Jomart Toqaev «Qazaqstan Respýblıkasynyń keıbir zańnamalyq aktilerine tarıhı-mádenı mura obektilerin qorǵaý jáne bilim berý-saýyqtyrý qyzmetteri máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zańyna qol qoıdy.
Oqý-aǵartý mınıstrliginiń málimetinshe, qabyldanǵan túzetýler balalarǵa arnalǵan qosymsha bilim berýdi damytýǵa baǵyttalǵan jáne bilim berý-saýyqtyrý qyzmetterin kórsetetin jyl boıy jáne maýsymdyq stasıonarlyq balalar lagerleriniń qyzmetine qatysty bolyp otyr.
Jańa zań aıasynda 2026 jyldan bastap qosymsha bilim berý uıymdary eki sanatqa bólinedi:
Birinshi sanat – qyzmeti lısenzııalaýǵa jatatyn bilim berý-saýyqtyrý qyzmetterin kórsetetin uıymdar. Ekinshi sanat – habarlamalyq tártippen jumys isteıtin qosymsha bilim berý uıymdary.Mınıstrlik bul tásil salany retteýdi jeńildetýge, sondaı-aq kórsetiletin qyzmetterdiń sapasy men senimdiligin arttyrýǵa múmkindik beretinin atap ótti. Balalardyń qaýipsizdigi men qyzmet sapasyn qamtamasyz etý maqsatynda balalar lagerleriniń qyzmeti 2026 jylǵy 1 sáýirden bastap lısenzııalanatyn bolady. Bul balalardyń demalysy, oqýy jáne saýyqtyrýy úshin qoıylatyn biryńǵaı talaptardy belgileýge múmkindik beredi.
«Lısenzııanyń qoldanylý merzimi bir jyldan bes jylǵa deıin uzartyldy. Bul uıymdarǵa túsetin ákimshilik júktemeni azaıtyp, qujattardy jyl saıyn qaıta rásimdeý qajettiligin boldyrmaıdy. Lısenzııanyń bes jylǵa berilýi uıymdardyń qyzmetiniń turaqtylyǵy men memlekettik baqylaýdy júıeli túrde júzege asyrý arasyndaǵy tepe-teńdikti qamtamasyz etedi», delingen habarlamada.