Prezıdent Qasym-Jomart Toqaev bıyl Qazaqstanda aýqymdy saıası ózgeristerdiń jańa kezeńi bastalyp, ekonomıkalyq reformalar jalǵasatynyn aıtty, dep habarlaıdy Egemen.kz.
Prezıdenttiń aıtýynsha, el aldynda turǵan mindetter aýqymdy ári jaýapty.
«Bıyl kóp jumys isteýimiz qajet. Saıası jańǵyrýdyń jańa kezeńi bastalyp, ekonomıkalyq reformalar jalǵasyn tabady», dedi Qasym-Jomart Toqaev.
Memleket basshysy Qazaqstannyń jańǵyrý jolyna birjola túsýi qoǵamnyń bolmysy men bet-beınesin túbegeıli ózgertýdi talap etetinin atap ótti.
«Elimiz jańǵyrý jolyna birjola túsip, qoǵamymyzdyń bolmysy men bet-beınesin túbegeıli ózgertýge tıis. Azamattarymyz jańa dáýirge beıimdelýi qajet. Bul – ońaı sharýa emes. Biraq, halqymyz, sonyń ishinde jastarymyz almaıtyn asý joq. Buǵan kámil senemin», dedi Prezıdent.
Suhbat barysynda Qasym-Jomart Toqaev bıylǵy jyldy Sıfrlandyrý jáne jasandy ıntellekt jyly dep jarııalaǵanyn eske saldy. Onyń aıtýynsha, bul – el úshin tarıhı múmkindik.
«Túbegeıli sıfrlyq ózgerister men jasandy ıntellektini engizý ekonomıkanyń ǵana emes, bilim berý, densaýlyq saqtaý, memlekettik basqarý sııaqty barlyq salanyń damýyna tyń serpin beredi», dedi Memleket basshysy.
Prezıdenttiń aıtýynsha, Táýelsizdigimizdiń 35 jyldyǵy – elimiz úshin aıtýly data ári osyǵan deıin júrip ótken jolymyzdy oı eleginen ótkizip, bolashaqqa jospar quratyn sát.
«Táýelsizdiktiń mereıli belesin as ta tók naýqanshyldyqqa aınaldyrmaý kerek, bul Qazaqstannyń ósip-órkendeýiniń sımvoly bolýǵa tıis», dedi ol.
Sonymen qatar, Memleket basshysy «Taza Qazaqstan» jalpyhalyqtyq aksııasyna erekshe toqtaldy.
Men Prezıdent retinde «Taza Qazaqstan» aksııasyn aldaǵy ýaqytta da erekshe nazarymda ustaımyn. Bul jumystyń mán-mańyzy óte zor. Sebebi, «Taza Qazaqstan» jurtty únemshil ári aqpeıil bolýǵa, dańǵazalyqtan arylýǵa, únemi izdenip, alǵa umtylýǵa, ortaq jaýapkershilikti umytpaýǵa, elge janashyrlyq tanytyp, qaıyrymdylyq jasaýǵa úndeıdi. Bizdiń bastamamyzben Birikken Ulttar Uıymy 2026 jyldy Halyqaralyq eriktiler jyly dep jarııalady. Bul qadam «Taza Qazaqstan» ıdeıasymen tolyq úndesedi.
Men osy jalpyhalyqtyq qozǵalysty aıryqsha mańyzdy ıdeologııalyq aksııa dep sanaımyn. О́ıtkeni, tazalyq degenimiz – maǵynasy tereń, mazmuny san qyrly uǵym. Tazalyq uǵymy jan dúnıeniń de, jer dúnıeniń de toqyraýyn emes, gúldenýin, kirshiksiz taza bolýyn bildiredi. Túptep kelgende, tazalyq ult bolmysynyń ózegine aınalýǵa tıis», dedi Prezıdent.
Toqaev eks-prezıdenttiń Máskeýge sapary týraly: Ne aıtylǵany maǵan qyzyq emes