Almaty oblysy, Qaratal aýdanynyń Aıtý aýyldyq okrýginiń ortalyǵy Kókpekti aýylynda elimizdegi 2190-shy meshit boı kóterdi. Alla úıiniń tusaýkeser rásimine Qazaqstan musylmandary dinı basqarmasy jáne Orta Azııa múftıler keńesiniń tóraǵasy, Bas múftı, sheıh Ábsattar qajy Dárbisáli qatysyp, búginde Qazaqstanda meshitter sanynyń artyp, eldiń ımandylyqqa bet buryp kele jatqanyn jetkizdi.Saltanatty jıyn QMDB-nyń Taldyqorǵan óńirindegi ókil ımamy, qarı Jumanáli Amanovtyń meshittiń ashylýyna oraı Quran oqyp, saýabyn jamanatqa baǵyshtaýymen bastaldy.
– Qazaqstan táýelsizdik alǵanǵa deıin elimizde bar-joǵy 68 ǵana meshit boldy, – dedi jıylǵan qaýymdy qýanyshtarymen quttyqtaǵan Bas múftı. – Olardyń ózi burynǵy dúken, mádenıet úıi sııaqty eski ǵımarattar edi. Ol kezde mynandaı záýlim meshitter salý jurttyń úsh uıyqtasa túsine kirmegen. Búgingi tańda áýeli bir Allanyń, sosyn táýelsizdiktiń, memleketti basqaryp otyrǵan Elbasynyń salıqaly saıasatynyń arqasynda 19 jyldyń ishinde 2190 meshittiń tusaýyn kesýdi násip etip otyr.
Jańa meshitke qasıetti “Quran Kárim” kitabyn tartý etken Bas múftı, odan ári kásipkerdiń de kásipkeri bolatynyn, qanaǵaty joq, bir tıyndy eki tıyn etsem dep júrgenderdiń de, eldiń ıgiligi úshin jol, kópir, meshit salyp bersem dep júrgen azamattardyń da bar ekenin aıta kelip, Kókpektidegi Alla úıin salǵan kásipker Nurbol Bolatulyn solardyń qataryna jatqyzyp, óz rızashylyǵyn bildirdi.
Búginde Kókpekti aýylynda 300-deı tútin bar. 50 sotyq jerdi alyp jatqan, shamamen júz oryndyq meshit úıi 10 aıdyń ishinde salynyp, jan-jaǵy túgel qorshalyp, aınalasyna shyrsha, emen aǵashtary otyrǵyzyldy. Aýyldyń ajaryna ajar, kórkine kórik qosqan meshittiń ózge salynǵan meshitterden ereksheligi – munda aýyl ımamyna eki qabatty úı salyp, barlyq jahazdarymen qosa berilgen. Eger din qyzmetkerleriniń memlekettik qyzmetke jatpaıtynyn, olarǵa kesimdi jalaqynyń berilmeıtinin eskersek, bul bir saýapty is bolyp tur. Sońǵy kezderi dinı oqý oryndaryn bitirgen bilimdi, saýatty túlekter óz júrek qalaýlarymen elimizdiń túkpir-túkpirine joldamamen barǵanmen, turatyn baspananyń joqtyǵynan, ondaǵy bılik ókilderi tarapynan eshqandaı qoldaý kórmegendikten bir jyldyń aınalasynda qaıtyp ketip jatatyny belgili jaıt. Máselen, bıyl 100-ge jýyq túlekter bitirip otyr. Sondyqtan, múmkindigi kelip jatsa, osyndaı saýapty isti qolǵa alǵan azamattar ózderi salǵan meshitterinde oqyǵan, bilimdi ımam bolsyn dese, osy máselege de den qoıyp, istiń sheshilýine uıytqy bolsa deımiz.
Oblystyq ákimdiktiń atynan qutty bolsyn aıtýǵa kelgen oblystyq máslıhattyń hatshysy Ardaq Sydyq, el aǵalary Bolat Ábishuly, Qaırat Satybaldy jáne de ózge azamattar sóılep, “jańadan ashylǵan meshit ishi jamaǵatqa tolsyn” degen ıgi tilekterin bildirdi.
Ardaqty paıǵambarymyz Muhammed (s.ǵ.s.): “Kimde-kim jerde qurqyltaıdyń uıasyndaı bolsa da meshit turǵyzsa, Alla taǵala ol úshin jánnatta bir úı salady” dese, hadıste: “Kóptegen jarııa sadaqalardyń ishinde Alla taǵalanyń razylyǵy úshin ǵıbadat jasaıtyn meshit salsa, ınshalla onyń saýaby aqyrette sońynan baryp turady” delingen.
“Jasy kishi demeńiz, aqyly assa, aǵa tut” degen, jasy kishi bolsa da úlken aǵalarynyń jolyn qýyp, kókpektikterge osyndaı záýlim meshit salyp bergen Nurbol balalaryna taǵylymy mol aýyl aqsaqaldary – Altynbek pen Tólegen atalary batasyn berdi. Kelgen qonaǵyna astyndaǵy atyn túsip beretin qazekeń emespiz be, aýyl turǵyndarynyń atynan Nurbolǵa tulpar mingizip, syıly qonaqtardyń ıyǵyna shapan japty.
– Meshit – masjıt degen sózden shyqqan. Iаǵnı, bas qoıatyn, Alla taǵalaǵa qulshylyq, ǵıbadat etetin oryn degen maǵynany bildiredi. Sondyqtan da meshitimizde Alla taǵalaǵa ǵıbadat etip, dúnıelik jáne aqyrettik jaqsylyǵyn tileýge jınalatyn jandarymyz kóbeısin. “Kúmbezdi el – kórikti, berekeli, ımandy el” deıdi. Birlikke shaqyratyn osyndaı meshitterimiz sany arta bersin, – dedi Kókpektidegi Tólegen meshitiniń ımamy, Nur-Múbárak ıslam-mádenıet ýnıversıtetiniń túlegi Erik Bólekbaev.
Kógildir jip qıylǵan soń jınalǵan jamaǵat ishke enip, namaz oqydy. Sońynda as berilip, saltanatty jıynǵa jınalǵan jurt dámnen aýyz tıdi.
Gúlzeınep SÁDIRQYZY.