2025 jyldyń jeltoqsan aıynda aılyq ınflıasııa deńgeıi 0,9% qurady. Azyq-túlik taýarlarynyń baǵasy 1,2%-ǵa, azyq-túlikke jatpaıtyn taýarlar 0,7%-ǵa, al aqyly qyzmetter 0,6%-ǵa ósti, dep jazady Egemen.kz.
Ulttyq statıstıka bıýrosynyń dereginshe, ótken aıda apelsın baǵasy 2,6%-ǵa, sábiz – 2%-ǵa, qant – 1,3%-ǵa qymbattady. Al jumyrtqa baǵasy 0,1%-ǵa tómendedi. Sondaı-aq konsentrattalǵan sút 2,1%-ǵa, qatty irimshik 1,8%-ǵa, kókónis shyryndary 1,6%-ǵa qymbattaǵan.
– Jekelegen dári-dármekter arzandady. Atap aıtqanda, sýprastın baǵasy 18,5%-ǵa, enap – 5,2%-ǵa, kanefron – 1,4%-ǵa, ıodomarın men azıtromısın – árqaısysy 0,9%-ǵa tómendedi. Avtomobılder 0,4%-ǵa, elektr quraldary 0,9%-ǵa arzandady. Al smartfondar 0,9%-ǵa, jeke gıgıena taýarlary 1,1%-ǵa qymbattady.
Kommýnaldyq qyzmetter arasynda sý burý tarıfteri 2,4%-ǵa ósti, al sýyq sý tarıfi 0,9%-ǵa tómendedi. Bir aı ishinde taksı qyzmetteri 1,8%-ǵa, monshaǵa barý quny 2,1%-ǵa, kınoteatr qyzmetteri 2,9%-ǵa qymbattaǵan, – delingen jazbada.
2025 jyldyń qorytyndysy boıynsha jyldyq ınflıasııa 12,3% boldy. Jeltoqsan aıynda azyq-túlik taýarlarynyń jyldyq ósimi 13,5%-dy, azyq-túlikke jatpaıtyn taýarlar 11,1%-dy, al aqyly qyzmetter 12%-dy qurady.
Azyq-túlik taýarlary arasynda jyldyq mánde qyzanaq baǵasy 7,9%-ǵa, kúrish – 4,8%-ǵa, qııar – 4,7%-ǵa, tátti burysh – 2,7%-ǵa, keptirilgen órik 2%-ǵa arzandady. Kerisinshe, júzim 7,7%-ǵa, kók shaı 7,9%-ǵa qymbattaǵan.
Azyq-túlikke jatpaıtyn taýarlar arasynda aıaq kıimge arnalǵan krem baǵasy 10,8%-ǵa, santehnıkalyq qospalaýysh 8,5%-ǵa, elektr burǵysy 6,6%-ǵa ósti.
2025 jyl ishinde turǵyn úı-kommýnaldyq qyzmetter salasynda sýyq sý tarıfteri 13,1%-ǵa tómendedi. Al aıaq kıim jóndeý qyzmeti 10,1%-ǵa, poshta qyzmetteri 8,9%-ǵa, avtosaqtandyrý 6,5%-ǵa qymbattady.
О́ńirler arasynda jyldyq ınflıasııanyń eń tómen deńgeıi Almaty qalasynda jáne Qostanaı oblysynda tirkelip, 11,7% qurady. Sondaı-aq Abaı, Jambyl jáne Batys Qazaqstan oblystarynda ınflıasııa deńgeıi 11,8% boldy.
2025 jylǵy qańtardan bastap tutyný baǵalary ındeksin esepteý qurylymynda azyq-túlik taýarlarynyń úlesi 40%, azyq-túlikke jatpaıtyn taýarlar 30,3%, aqyly qyzmetter 29,7% boldy. Inflıasııa deńgeıin sıpattaıtyn tutyný baǵalary ındeksi aı saıyn eseptelip, 508 taýar men qyzmet túri boıynsha júrgiziledi.