Májilistegi «AMANAT» partııasy fraksııasynyń músheleri Astanadaǵy Otan soǵysy ardagerlerine arnalǵan ortalyq klınıkalyq gospıtal ujymymen kezdesti. Ardagerlerdiń densaýlyǵyn saqtaý, qart pasıentterge kómek kórsetý júıesin damytý jáne medısına qyzmetkerlerin qorǵaý máseleleri jıynnyń basty taqyryby boldy, dep jazady Egemen.kz.
Kezdesý barysynda depýtattar búgingi tańda aǵa býyn adamdarǵa medısınalyq kómek kórsetý júıesi qalaı qurylǵanyn, eldegi gerontologııa men gerıatrııanyń qalaı damyp jatqanyn jáne Parlamenttiń odan ári jumysynyń nazarynda qandaı mindetter qalýy kerektigin egjeı-tegjeıli talqylady.
Májilis depýtattary Pavel Kazansev, Samat Nurtaza, Marat Bashımov, Dáýlet Turlyhanov jáne Senat depýtaty Gennadıı Shıpovskıı ondaǵan jyl boıy Uly Otan soǵysynyń ardagerlerine, tyl eńbekkerlerine jáne olarǵa teńestirilgen azamattar sanattaryna mamandandyrylǵan kómek kórsetetin gospıtal – biregeı medısınalyq mekemeniń qyzmetimen tanysty.
Dáýlet Turlyhanov 2025 jyl Uly Otan soǵysyndaǵy Jeńistiń 80 jyldyǵymen atap ótilgenine toqtaldy. Soǵys jyldarynda maıdanǵa 1 mln 200 myńnan astam qazaqstandyq, ıaǵnı, respýblıkanyń árbir tórtinshi turǵyny maıdanǵa attanǵanyn, olardyń jartysyna jýyǵy úıine oralmaǵanyn aıtty.
– Bizdiń urpaq úshin Jeńistiń 80 jyldyǵy – eń aldymen, onyń shynaıy baǵasyn túsiný bolyp tabylady. Bizdiń ákelerimiz ben atalarymyzdyń erligi abstraktili ótken shaq emes, urpaqtar sabaqtastyǵyn saqtaıtyn adamgershilik baǵdar. Bizdiń mindetimiz – bul tarıhı shyndyqty saqtaý jáne ony kelesi urpaqtyń sanasyna sińirý, - dedi ol.
Kezdesýge qatysýshylar egde jastaǵy adamdardyń densaýlyǵyn saqtaý ómir sapasyn, belsendi uzaq ómir súrýdi jáne qoǵamnyń áleýmettik turaqtylyǵyn qamtamasyz etýdiń negizgi faktorlarynyń biri ekenin atap ótti. Gerıatrııanyń medısınalyq kómektiń derbes baǵyty retindegi róline, keshendi gerıatrııalyq baǵalaýdy, pánaralyq tásildi jáne kómek kórsetý deńgeıleri arasyndaǵy sabaqtastyqty engizý qajettiligine erekshe nazar aýdaryldy.
– Halyqtyń qartaıýy jaǵdaıynda gerontologııa men gerıatrııany damytý máseleleri strategııalyq mańyzǵa ıe. Búgingi tańda problemalar týraly aıtyp qana qoımaı, egde jastaǵy azamattarǵa qoljetimdi, sapaly jáne keshendi medısınalyq kómek kórsetetin júıeli zańnamalyq sheshimderdi qalyptastyrý mańyzdy. Halyqtyń qartaıýy bolashaq máselesi emes, búgingi kúnniń shyndyǵy. Qazaqstannyń qart azamattarynyń ómir súrý sapasy qazir qandaı sheshim qabyldaıtynymyzǵa tikeleı baılanysty, - dep atap ótti «AMANAT» partııasy fraksııasy basshysynyń orynbasary Pavel Kazansev.
Gospıtal ujymymen áńgime barysynda depýtattar Májilistegi «AMANAT» partııasy fraksııasynyń bastamasymen jáne belsendi qatysýymen medısına qyzmetkerlerin qorǵaýǵa jáne azamattar úshin medısınalyq kómektiń qoljetimdiligin keńeıtýge baǵyttalǵan normalar ázirlengenin atap ótti.
О́tken senbide Memleket Basshysy Qasym-Jomart Toqaev medısına qyzmetkerleri men jedel járdem qyzmet qyzmetkerlerine qater tóndirgeni jáne zorlyq-zombylyq kórsetkeni úshin jaýapkershilikti kúsheıtetin tıisti zańǵa qol qoıdy. Zań dárigerlerdiń qaýipsizdigin qamtamasyz etýdegi negizgi qadam boldy. Sonymen qatar, 2024 jyldan bastap elimizde medısına qyzmetkerleriniń kásibı jaýapkershiligin mindetti saqtandyrý júıesi engizildi. Endi medısınalyq qatelik boıynsha tólemder mamandardyń jeke qarajatynan emes, saqtandyrý tetikteri esebinen júzege asyrylady.
Jıynda depýtattar medısına qyzmetkerleriniń barlyq suraqtaryna jaýap berip, ózekti máseleler týraly ashyq sóılesti. Jergilikti mamandardyń usynystarv men máselelerin depýtattar baqylaýǵa alady, olar salalyq mınıstrliktermen birlesip pysyqtalatyn bolady.
Májilis depýtattarynyń óńirlerdegi kezdesýleri 5-13 qańtar aralyǵynda jalǵasady. Jumys saparlary barysynda AMANAT, Aýyl, Aq jol, JSDP, QPK jáne Respublica saıası partııalarynyń parlamenttik fraksııalarynyń depýtattary saılaýshylardy qabyldanǵan zańdar týraly habardar etedi, olardyń jergilikti jerlerde qoldanylý barysyn zerdeleıdi jáne azamattardy tolǵandyratyn ózekti máseleler men problemalardy tyńdaıdy.