Tehnıkalyq jáne kásiptik bilim júıesine jasandy ıntellektini engizýge arnalǵan respýblıkalyq baǵdarlama iske qosyldy. Jańa joba Astana qalasyndaǵy tehnıkalyq jáne kásiptik bilim júıesinde jasandy ıntellekt (AI) quraldaryn qoldanýǵa baǵyttalǵan.
Atalǵan baǵdarlamany Oqý-aǵartý mınıstrliginiń «Talap» kommersııalyq emes aksıonerlik qoǵamy tarapynan seriktes kompanııalarymen birge júzege asyryryp jatyr.
Jaýapty uıymnyń taratqan aqparatyna súıensek, osy joba aıasynda elordada «Bilim berý úderisindegi jasandy ıntellekt quraldary: oqytý tıimdiligin arttyrý» taqyrybynda tegin biliktilikti arttyrý kýrstarynyń resmı ashylýy ótti. Bastama IT-salasynyń mamany emes kolledj oqytýshylaryna arnalǵan jáne Astana qalasyn, sondaı-aq Aqmola men Qaraǵandy oblystaryn qamtıdy.
Jobanyń negizgi maqsaty – pedagogterdiń sıfrlyq jáne tehnologııalyq quzyretterin damytý, sondaı-aq jasandy ıntellekt quraldaryn oqý úderisinde tıimdi qoldanýǵa úıretý. Oqý baǵdarlamasy 10 aptaǵa josparlanǵan jáne gıbrıdti formatta ótedi. Qatysýshylar zamanaýı vırtýaldy platformalar arqyly teorııalyq bilimdi tájirıbemen ushtastyryp, praktıkalyq daǵdylaryn jetildiredi.
Baǵdarlamanyń basty ereksheligi – onyń praktıkalyq baǵyttylyǵy. Tyńdaýshylar álemniń jetekshi ýnıversıtetterinde bilim alǵan sarapshylardyń dáristerin tyńdap, halyqaralyq tehnologııalyq kompanııalar ókilderimen tájirıbe almasý múmkindigine ıe bolady.
Qorytyndy kezeńde bilim men bıznes salasyna arnalǵan AI-jobalardy ázirleýge baǵyttalǵan «Hackathon Battle» uıymdastyrylady.
Oqýdy sátti aıaqtap, óz jobalaryn qorǵaǵan qatysýshylarǵa «Talap» KeAQ-tyń resmı sertıfıkattary tabystalady.