2026 jyly «Qazaqstan temir joly» poıyzdary men «Air Astana» áýe kemelerinde jolaýshylar úshin spýtnıktik ınternet iske qosylady. Bul týraly Jasandy ıntellekt jáne sıfrlyq damý mınıstri Jaslan Mádıev Úkimet otyrysynda málimdedi, dep habarlaıdy Egemen.kz.
Mınıstrdiń aıtýynsha, qazirgi ýaqytta elimizde úsh spýtnıktik ınternet operatory jumys istep tur. Jaqyn arada naryqqa taǵy eki sheteldik kompanııa keledi dep kútiledi.
Tehnologııalardy pılottyq synaqtan ótkizý 2026 jylǵa josparlanǵan. Sonymen qatar jergilikti ákimdikter bıýdjet esebinen týrıstik aımaqtar men jetýi qıyn eldi mekenderdi spýtnıktik baılanyspen qamtýy tıis.
Bıyl 1900 eldi mekenge joǵary jyldamdyqty ınternet qosylady
Infraqurylymdy damytý aıasynda kelesi mańyzdy sharalar júzege asyrylmaq:
Aldaǵy eki jylda 40 myń shaqyrym respýblıkalyq jáne oblystyq mańyzy bar joldar mobıldi baılanyspen qamtylady. 5G jelisi: Qazirgi ýaqytta 20 qalada qoljetimdi 5G jelisiniń qamtý aýmaǵyn 75%-ǵa deıin jetkizý kózdelip otyr. 2026 jyldyń sońyna qaraı 3 myńnan astam aýylǵa optıkalyq talshyqty baılanys jelisi tartylady. Nátıjesinde halyqtyń 99%-y joǵary jyldamdyqty ınternetke qol jetkizedi.Sonymen qatar ol talshyqty-optıkalyq jelilerdi tikeleı úılerge jetkizýdi kózdeıtin «Sońǵy mıl» jobasyn iske asyrý jalǵasyp jatqanyn aıtty.
«Joba 400 000 úı sharýashylyǵyna arnalǵan talshyqty-optıkalyq jelilerdi qamtıdy. Qosymsha 2,5 mıllıon adamǵa qol jetkiziledi», dedi J. Mádıev.