Oblystyq kózi kórmeıtin jáne nashar kóretin azamattar kitaphanasy men aıtysker aqyndar, jyrshy-termeshiler odaǵynyń uıymdastyrýymen jas aqyn Sanjar Qanatbektiń «Jaryq dúnıe» atty jyr jınaǵynyń tanystyrylymy ótti. Jas talanttyń shyǵarmashylyǵyn jergilikti oqyrmandar arasynda keńinen nasıhattaýdy maqsat etken is-sharada aqynnyń jańa jınaǵynyń braıl qarpindegi nusqasy men aýdıotaspasy jınalǵan kópshilikke tanystyryldy.
Is-sharada jas talanttyń sózine jazylǵan birneshe jańa ánniń tusaýy kesildi. Ánshi-kompozıtor Aınash Beısen Sanjardyń «Qıyn eken» shyǵarmasyna jazylǵan jańa ándi shyrqap, kesh ıesine izgi tilegin jetkizdi. О́z kezeginde janarynan nur taısa da, ómirdi ózinshe jaqsy kóretin jas aqyn tyrnaqaldy týyndysynyń tanystyrylymyna kelgen kópshilikke rızashylyǵyn jetkizdi.
Úsh jasynda kózi kórmeı qalsa da, taǵdyrdan baz keshpegen jastyń jetken jetistigi az emes. Súıegine sóz sińgen Sanjar kórkem ádebıetti oqyǵandy, kóńiline toqyǵandy aıryqsha jaqsy kóredi. Sondaı-aq ol kásipqoı sportshy retinde de birshama bıikti baǵyndyrǵan. Parapaýerlıftıng sportyna ańsary aýǵan sańlaq Aqtaý shaharynda ótken el chempıonatynda top jarǵan. Sonymen qatar Mysyr elinde ótken álem chempıonatynda qola júldeger atanǵan.
«Ol – naǵyz eńbekqor azamat. Onyń ón boıyndaǵy jiger men qaısarlyq kimdi de bolsyn tánti etpeı qoımaıdy. Sol eńbekqorlyǵynyń arqasynda talaı bıikti baǵyndyrdy. О́mirdi ózgeshe súıetin shákirtimniń alar asýy alda ekenine bek senimdimin. Sportpen shuǵyldanyp qana qoımaı, órnegi ózgeshe óleńder jazyp júrgen shákirtimmen maqtanamyn. Árdaıym joly ashyq bolsyn», deıdi chempıonnyń jattyqtyrýshysy Rýslan Greev óz oıymen bólisip.
Júregi jyr dep soqqan Sanjardyń alǵashqy shyǵarmashylyq keshinde jınalǵandar tarapynan qurmet te, izgi tilek te tolastaǵan joq. Kórkem ádebıetti janyndaı súıetin jas aqyn jurttyń maqtaýyna masaıraǵan joq. Jurttyń jaqsy pikirin óziniń damýyna degen alǵyshart retinde qabyldaıtynyn aıtyp qaldy. Sport pen poezııany qatar alyp júrýge bel baılaǵan Sanjarǵa tolaıym tabys tileımiz.
Taraz