Premer-mınıstr Oljas Bektenov Prezıdent tapsyrmalaryn oryndaý sheńberinde jekemenshik bilim berý jáne medısınalyq uıymdardy memlekettik qarjylandyrý júıesin reformalaý jóninde jıyn ótkizdi.
Úkimet basshysy Oqý-aǵartý, Densaýlyq saqtaý jáne Qarjy mınıstrlikteriniń aldyna jan basyna shaqqandaǵy qarjylandyrý júıesindegi teńgerimsizdikterdi joıý mindetin qoıdy.
Jıynda memleket sapaly ári qoljetimdi qyzmetter kórsetýge qatysty mindettemelerdi ózine alatyny jáne mekemelerde oryn bolmaǵan jaǵdaıda jekemenshik uıymda oqýǵa jan basyna shaqqandaǵy qarjylandyrý qarastyrylǵany atap ótildi. Dese de bul múmkindikti teris paıdalaný derekteri tirkelip otyr. Sýbsıdııa kólemin kóbeıtý maqsatynda oqýshylar men muǵalimderdiń jasandy legi týyndap jatyr. Bul bilim sapasyna, sondaı-aq memlekettik shyǵyndardyń tıimdi jumsalýyna teris áser etedi.
Premer-mınıstr jekemenshik bilim berý uıymdaryna qatysty qymbat oqý aqysy máselesin de atap ótti. Ol memlekettik bıýdjet «elıtalyq» mektepterdiń qyzmetin qarjylandyrýǵa jumsalmaýy keregin erekshe aıtty. Mundaı mektepterde ata-analardyń tólemderi oqý úderisin tolyq qamtamasyz etýge múmkindik beredi.
Qarjy mınıstri Mádı Takıev jeke mektepterge memlekettik tapsyrys berý tetikterin qaıta qaraýǵa qatysty jumystar týraly baıandady. Osy máselelerdi sheshý maqsatynda jekemenshik mektepterdiń qarjylandyrý úderisteri tolyq sıfrlandyrylyp, qyzmetterge tólemder kelisimsharttan bastap aqsha tóleýge deıin esepke alyndy.
OrtaBilim qyzmetiniń bıylǵy 6 qańtardaǵy málimetterine sáıkes, e-Qazyna.kz veb-portalynda 789 jeke mekteppen 78,7 mlrd teńge kóleminde qarjylandyrý kelisimderi jasalǵan. (2025 jyly – 845 mektep). Sondaı-aq buryn qarjylandyrylǵan 206 mekeme belgilengen talaptarǵa saı kelmeıdi. Oqýshylar men muǵalimderdi jalǵan tirkeý men qosarlanǵan esepke alý, ruqsat etilgen jobalyq qýattan artyq júkteý jáne taǵy basqa jaǵdaılar anyqtaldy.
Aýdıt barysynda tómendegideı aldyn ala nátıjeler belgili boldy. 1 333 oqýshynyń bir mektepten ekinshi mektepke 5-ten 12 retke deıin kóshýi, 64 jekemenshik mektepte oqýshylardyń sany jobalyq qýattan eki ese artyq bolýy, 2024 jyly 167 jeke mekteptiń salyqtyq eseptiliginde kirister kórsetilmegeni anyqtalǵan.
Ishki memlekettik aýdıt qyzmetiniń aýmaqtyq departamentteri arnaıy hat jiberip, nátıjesinde mektepter 1,2 mlrd teńge kóleminde salyq tóledi. Búginde 46 mektepte qarsy tekserýler júrgizilip jatyr.
Kelesi kezeńde memlekettik mektepter (6 887 mektep), balalar baqshalary men ýnıversıtetter de sıfrlandyrylatyn bolady. Bul qadam bilim berý qyzmetterin bıýdjetten qarjylandyrýdyń barlyq sıklinde tolyq ashyqtyqty qamtamasyz etýge múmkindik beredi.
Jıyn barysynda jekemenshik bilim berý mekemelerin lısenzııalaý tásilderin qaıta qaraý máselesi de qaraldy. Jeke uıymdardyń azamattarǵa medısınalyq qyzmet kórsetýi salasynda tártip ornatý maqsatynda úkimettik jumys toby azamattardan kelip túsetin ótinishterdi qaperge ala otyryp, «Áleýmettik medısınalyq saqtandyrý qory» AQ-nyń aktıvterine taldaý júrgizedi. Onyń nátıjeleri boıynsha Qordyń tıimdiligin odan ári arttyrýǵa baǵyttalǵan is-sharalar qabyldanady.
Jıyn qorytyndysynda Oqý-aǵartý, Densaýlyq saqtaý, Qarjy mınıstrlikterine bir apta merzimde atalǵan máselelerdi sheshý boıynsha naqty usynystar engizý tapsyryldy. Bul jumystardy úılestirý Premer-mınıstrdiń orynbasary Aıda Balaevaǵa júkteldi.